1021
Тээмэндэ түгэсэһэн Олимпиин наадануудта сүлөөтэ барилдаанай мүрысөөндэ табадахи һуури эзэлһэн монголой барилдаашан Ганзоригай Мандахнаранда нютагайхидынь алтан медаль бэлэглэбэ. Мүн тиихэдэ 20 миллион төгрөг тэрээндэ барюулагдаа. Харин “Хучит Чулуут” компани хоёр таһалгатай байра бэлэглээ. Гэхэтэй хамта, аяар холо Канадын эрхэтэн, эдир һурагша тусхай бэшэгтэйгээр Мандахнаранда өөрынгөө медаль эльгээбэ.
Ушарынь гэхэдэ, Олимпиин нааданда 65 килограмм хүрэтэр шэгнүүртэ Ганзоригой Мандахнаранай гурбадахи һууриин түлөө тэмсээндэ шүүгшэд алдуу гаргажа, хүрэл медаль Узбекистанай барилдаашанда зүүлгээ һэн.
Энэ уулзалга арсалдаата олон асуудал үлөөгөө. Юуб гэхэдэ, уулзалгын түгэсэтэр хэдэн секунда үлөөд байхадань, Мандахнаран Узбекистанай Ихтиор Наврузовые 7:6 гэһэн тоотойгоор илажа байгаа. Эгээл энэ үедэ монголой тамиршанай барилдаанһаа арсажа, хибэс дээгүүр гүйжэ эхилхэдэнь, шүүгшэд нэгэ очко Узбекистанай түлөөлэгшэдэ үгэжэрхёо. Энэ арсалдаата ушараар барилдаан дүүрээгүй. Монголой тала буруушааһан тухай мэдүүлжэ, гуримай ёһоор кубик шэдэбэ. Хибэс дээрэхи шүүгшэд хэр зүб шиидхэбэри абааб гэжэ, нааданай ахамад судья видео дабталга хараад, үшөө нэгэ очко Ихтиор Наврузовто үгөө. Тиигэжэ, Узбекистанай тамиршан 8:7 гэһэн тоотойгоор илалта туйлажа, Олимпиин нааданай хүрэл медальда хүртэбэ. Мандахнаранай һоригшо энээниие буруушажа, дээрэхи бүхы хубсаһаа тайлажа, судьянарай шэрээ дээрэ хаяһан байна. Харин Мандахнаран нюдэнһөө уһа гоожуулан, хибэсһээ гаража ошоо һэн.
Энэ ушараар, дэлхэйн олон тоото зон шүүгшэдэй буруу шиидхэбэри абаһые тэмдэглэбэ. Ultimate Fighting Championship гэһэн мэдээжэ мүрысөөнэй оло дахин чемпион, Америкын Холбоото Штадуудай олимпиин командын гэшүүн байһан Дэниел Кормье монголой барилдаашан энэ уулзалгада шүүһэн байна гэжэ мэдүүлээд, шүүгшэдэй шиидхэбэри буруушааба.
Канадын Оттава хотодо ажаһуудаг монгол шуһатай һурагша Д. Уянга барилдаашанда бэшэг бэшэжэ, өөрынгөө медаль дамжуулба.
- Сайн байна, хүндэтэ Монголой габьяата тамиршан Мандахнаран! Хүрэл медалиин түлөө барилдахадатнай бүхы гэр бүлөөрөө хараһан байнабди. Шүүгшэдэй буруу шиидхэбэри абахадань, би ехээр бархирааб. Энэ Олимпиадын үедэ Ирландиин нэгэ хүбүүн нютагайнгаа боксерто өөрынгөө хүрэл медаль бэлэглэһэн тухай Интернет соо уншааб. Тиимэһээ, бишье баһа Таанадта өөрынгөө медаль зорюулха һанаатайб, - гэжэ Д.Уянга бэшэһэн байна.
Ганзоригой Мандахнаранай гэртээ бусахадань, Монголой барилдаашадай эблэлэй гэшүүд тамиршандаа мүнгэн бэлэг суглуулхыень ажаһуугшадта хандаба. Мүн Олимпиин медаль тэдэ бэлдэһэн байна.
Монголой барилдаанай федераци Швейцарида байрладаг спортын арбитражна сүүдтэ Мандахнарантай болоһон ушарые дахинаа хаража үзэхыень зарга бариһан байна.
Автор: Борис БАЛДАНОВ
