1114
Оросой ниислэлдэ үнгэргэгдэһэн “Торгон зам” гэһэн уласхоорондын мүрысөөндэ Буряадаймнай тамиршад амжалтатайгаар хабаадаба. Хитадай, Грузиин, Эстониин болон Оросой 200 гаран ушуистнар хибэс дээрэ гараа.
Энэ шанга тулалдаануудта манай Буряадай тамиршад 9 медаль абажа шадаа. Альбина Арамхиева хоёр алтан болон нэгэ мүнгэн медальда хүртөө. Залуу һоригшо Алина Федорова хоёр дахин чемпион болоһон байна. Гурба дахин шангай хоёрдохи һуури Татьяна Багаева эзэлээ. Үшөө нэгэ хүрэл медаляар Ирина Долбанова урмашуулагдаа.
Буряад Уласай Арадай Хуралай депутат Игорь Марковецэй хэлэһээр, ушугай шэнэ халаанай тамиршад иимэ ехэ амжалтаһаа эхилбэ. Юуб гэхэдэ, тус мүрысөөн Хитад болон Орос гүрэнэй дунда эб найрамдал тогтоохын тула эмхидхэгдэнэ. Тиимэһээ, ушугай эхи табигша хитад угсаатантай мүрысэхэдөө, манай тамиршад ехэ дүй дүршэлтэй болоно.
Автор: Борис БАЛДАНОВ
