​Оросой Кубогта хүртэхын тула шанга тулалдаан

Үнгэрһэн долоон хоногто Улаан-Үдэ хотодо һур харбалгаар Россиин Кубогта хүртэхын түлөө мүрысөөн болобо. Орос гүрэнэй 18 можо хизаарнуудай 300 гаран тамиршад дүрбэн үдэрэй хугасаада мүрысэбэ. Оросой Һур харбалгын федерациин хүтэлбэрилэгшэ, 1988 оной Олимпиин наадануудай хүрэл медаль абагша Владимир Николаевич Ешеев хүндэтэ айлшаар буугаа. Харин 2016 оной Олимпиин наадануудта мүнгэн медальда хүртэжэ шалгарһан Ксения Перова, Туяна Дашидоржиева болон манай нютагай Инна Степанова мүрысөөе шэмэглээ.

Автор: Борис Балданов
Описание: Нээлгын үедэ

Владимир Ешеев Улаан-Үдэдэ олон тоото уулзалгануудые үнгэргөө. Буряад Уласай Толгойлогшо Вячеслав Наговицынтай, Арадай Хуралай Түрүүлэгшэ Цырен-Даши Доржиевтай уулзажа, һур харбалгын хүгжэлтэ тухай шанга хөөрэлдөө эмхидхээ. Тиигэжэ Вячеслав Наговицынай хэлэһээр, 2017 ондо манай Буряадта һур харбалгын танхим баригдаха ёһотой. “Тиимэһээ 2020 ондо Токиодо болохо Олимпиин наадануудта манай хүбүүд, басагад чемпионшье боложо магадгүй”, - гээд уласай Толгойлогшо тэмдэглээ.

- Улаан-Үдэдэ болоһон мүрысөөн ехэ удхатай. Юуб гэхэдэ, тэрэ Олимпиин шэнэ халааниие эхилээ. Риодо мүнгэн медаль абаһан басагадаймнай хабаадаһаниинь һайшаалтай. Ушар гэхэдэ, ургажа ябаа залуу халаан тэдэниие өөрынгөө нюдөөр хаража, танилсажа, хөөрэлдэжэ байхадань удхатай. Удангүй ургажа ябаа залуушуул һайн дүн харуулха байха, - гэжэ Владимир Ешеев нээлгын баяр ёһололой үедэ амаршалгынгаа үгэнүүд соо хэлээ.

Буряадай тамиршад энэ мүрысөөндэ нэгэшье алтан медаль абажа шадаагүй гээд, абаһаар лэ хэлэхэ хэрэгтэй. Мүн Ксения Перова, Туяна Дашидоржиева, Инна Степанова гурбан хэлсэһэндэл, дүрбэлжэн финалай шатада шүүгдэбэ.

Классическа түхэлэй һур номшоор харбагшадай дунда хубиин тоосоондо манай Наталья Эрдыниева хоёрдохи һуурида гараа. Тэрэ финальна уулзалгада Шэтын Саяна Цыремпиловатай уулзажа, 5:6 гэһэн тоотойгоор шүүгдэбэ. Эндэ Татьяна Бильтрикова гурбадахи һуури эзэлхын түлөө үшөө нэгэ Үбэр-Байгалай хизаарай тамиршан Арюна Жаргаловае илажа гараа.

Автор: Борис Балданов
Описание: Наталья Эрдыниева финалда харбана

Эрэшүүлэй дунда шангай гурбадахи һуури Эрдэм Цыдыпов эзэлээ. Эндэ түрүүшын хоёр һуурида Агын тойрогой Һүдэнтэ һууринһаа уг гарбалтай Болот Цыбжитов болон Арсалан Балданов гэгшэд гаража, алтан ба мүнгэн медальнуудаар урмашуулагдаа.

Командна тоосоондо Буряадай тамиршад Наталья Эрдыниева, Татьяна Бильтрикова болон Виктория Будаева гэгшэд финалда Үбэр-Байгалай хизаарай командада (Арюна Жаргалова, Саяна Цыремпилова, Ханда Жамьянова) шүүгдэбэ.

Блочно түхэлэй һур номшоор харбагшадай дунда Буряадһаа уг гарбалтай, мүнөө үедэ Ямало-Ненецкэ автономно тойрогой түлөө харбадаг Владимир Калашников (гол фото-зураг дээрэ байна) Россиин Кубогта хүртэбэ. Командна тоосоондо Буряадай суглуулагдамал команда хоёр медаль абаа. Жанна Тухалова, Татьяна Андриевская, Дарья Догарь гэгшэд мүнгэн медальда хүртөө. Данзан Халудоров, Чингис Цындыжапов болон Виктор Раднаев гэгшэд гурбадахи шангай һуури эзэлээ.

Автор: Борис Балданов
Описание: Буряадай суглуулагдамал команда