​Самбо барилдаае һургуулида нэбтэрүүлхэ

Самбо барилдаан хадаа СССР-тэ байгуулагдаһан түүхэтэй. Тиимэһээ мүнөө болоходо, гүрэнэй засаг түрэ баригшадай дунда дэмжүүлэгдэжэ байһаниинь гайхалгүй. Тиигэжэ 2017 оной һуралсалай жэлэй эхинһээ “Самбо - һургуулинуудта” гэһэн гаршаг доро бүхы һургуулинуудта физкультурын гурбадахи хэшээл болгогдожо үзэгдэхэнь гээшэ. Энээн тухай хэлсээн Россиин Президент Владимир Путинтай баталагданхай.

Буряад Уласай Самбо барилдаанай федерациие олон жэлдэ түрүүлһэн мэдээжэ һоригшо Тумэн Санжиевай хэлэһээр, тэдэ бүхы хүбүүд, басагадые самбист болгохоо һананагүй.

- Манай ажабайдалда элдэб ушар тохёолдодог гээшэ. Заримдаа үбэл хүнүүд халтиржа унажашье магадгүй. Энэ ушарта зүбөөр, бэеэ гэмтээнгүй унахые хэшээлнүүдтэ заахабди. Мүн тиихэдэ бэеэ аршалжа шадаха хэрэгтэй. Энээндэ баһа һурагшадые һургаха түсэбтэйбди, - гэжэ Тумэн Санжиев хөөрэнэ.

Мүнөө һуралсалай жэл - туршалгын хаһа гээд самбистнар тэмдэглэнэ. Тиимэһээ тэдэ аймагуудаар ябажа, идхалгын ажал ябуулна. Бүхы энэ ажал Буряад Уласай һуралсалай бодол нэбтэрүүлгын дээдэ һургуулиин хараа доро хэгдэнэ. Тус һуралсалай гуламтын мэргэжэлтэн Алёна Шагдуровагай хэлэһээр, мүнөө сагта физкультурын гурбадахи хэшээлдэ самбо барилдаа үзэхэ талаар тусхай методико хэблэгдэжэ, һургуулинуудаар тараагдана. Мүн хирэ-хирэ болоод лэ, физкультурын багшанарай болон һоригшодой дунда һуралсал эмхидхэгдэхэ юм.

Һүүлэй мэдээгээр, Хяагтын, Захааминай, Кабанскын, Сэлэнгын аймагуудай хэдэн һургуулинууд мүнөөшье самбо барилдаае үзэхөөр бэлэн байһанаа мэдүүлээ. Бүхы дээрээ 10 һургуули иимэ шиидхэбэри абанхай.

Үнгэрһэн долоон хоногой эсэстэ Кабанскын аймагай Хүдэри-Байгалай дунда һургуулида барилдаанай танхим нээгдэбэ. Һургуулиин захирал Галина Трескинагай хэлэһээр, тус ажал ябуулхын түлөө олон үдэр соо һанамжалһан байна.

- Яагаад самбо барилдаа һурагшадта заахабди? Манай физкультурын багша шадаха юм гү гэһэн элдэб асуудалнууд гараа, - гэжэ һургуулиин захирал Галина Иннокентьевна хөөрэнэ. – Манай нютагай бэрхэ хүбүүн Евгений Васильевай “би энэ ажал өөр дээрээ даажа абахаб” гэхэдэнь, зүбшөөлөө үгөөбди. Зунай хаһада тэрэ хоёр таһалга нэгэдүүлжэ, заһабарилгын ажал ябуулаа. Эгээл тэндэ самбо барилдаанай хэшээлнүүд болохо юм. Тус ажал бүтээхэдэ, туһа хүргэһэн нютагайнгаа олзын хэрэг эрхилэгшэдтэ баярые хүргэнэб.

Хүдэри-Байгалда самбо нэбтэрүүлэгдэжэ эхилһэндэнь гайхалгүй. Юуб гэхэдэ, энэ нютагай Наталья Нелюбина спортын мастерай нэрэ зэргэдэ хүртэнхэй. Харин Маргарита Васильева спортын мастерта кандидат юм. Барилдаанай танхимай нээлгын баяр ёһололой үедэ самбо барилдаанай һонирхолтой оньһо нюуса нэрьемэ альга ташалган доро харуулаа.