​Якутскын алтан - буряад барилдаашадта

Нэгэ долоон хоногой хугасаада Буряадаймнай барилдаашад хоёр томо уласхоорондын мүрысөөндэ шалгарба. Кемерово хотодо дүрбэн алтан медаль абаад, удаань Якутск ошожо, хоёр шэгнүүртэ түрүүлжэ гараба.

Олимпиин чемпионууд болоһон Роман Дмитриев, Павел Пинигин болон Саха-Яхадай мэдээжэ хэдэн барилдаашадай һоригшо байһан Дмитрий Коркиной мүнхэ дурасхаалда зорюулагдаһан мүрысөөн заншалта ёһоороо намарай хоёрдохи һарын эхиндэ Якутск хотодо эмхидхэгдэнэ. Мүнөө жэлэй тулалдаануудта 20 гаран гүрэнэй 200 тамиршан хибэс дээрэ гараа.

Хоёрдохи жэлээ Буряадай тамиршан Евгений Жербаев Якутскын хибэс дээрэ түрүүшын һуури эзэлбэ гээшэ. 70 килограмм хүрэтэр шэгнүүртэ Евгений барилдаһан байна. Нэн түрүүн Грециин түлөөлэгшые тэрэ 12:0 гэһэн тоотойгоор диилэжэ гараа. Мүн удаадахи уулзалгада Буряадай барилдаашан 2016 оной Европын чемпионадта хүрэл медальда хүртэһэн Красноярскын Исраил Касумовтай хибэс дээрэ гараа. Энэ тэмсээн түгэсэтэрөө харагшадай һонирхол татажа, Евгений Жербаев 12:10 гэһэн тоотойгоор шүүгээ гэжэ элирүүлэгдээ. Үшөө Красноярскын болон Энэдхэгэй барилдаашад Буряадай тамиршантай юушье хэжэ шадангүй һалаба. Түрүү һуури эзэлхын түлөө тэмсээндэ Якутск хотын Герман Устиновтай Евгений уулзажа, һүүлшын минутын хугасаа соо амжалта туйлаба.

- Мүнөө жэлэй мүрысөөндэ олон бэрхэ барилдаашад хабаадана. Тиимэһээ шүүхэб гэжэ уридшалһан бодол толгойдом ороогүй. Финалда хибэсэй эзэн Герман Устиновтай уулзахадамни, бүхы харагшад Яхадай барилдаашанай түлөө байбашье, илажа шадааб. Хибэс дээрэ өөрын хэжэ шадаха ажалаа һайнаар бүтээһээндээ баяртайб, - гэжэ Евгений Жербаев Саха-Яхадай сурбалжалагшадта мүрысөөнэй һүүлээр дуулгаба.

Эгээл хүндэ шэгнүүртэ бүһэтэйшүүлэй дунда Балдан Цыжипов 2015 ондо гурбадахи һуури эзэлһэн байна. Тиихэдэ “жэл болоод, заал һаа түрүүлхэб” гээд Балдан гэртээ бусаа һэн. Үнгэрһэн амаралтын үдэр Балдантай тэмсэхэ хүн олдобогүй. Украинын болон Грузиин барилдаашад Балдантай тэмсэжэ шадабагүй. Хахад финалай уулзалгада Балдан нютагайнгаа хүбүүн Цыбик Максаровай нюрга шоройдуулаа. Алтан медаль абахын түлөө Кемерово хотын Павел Кривцовые Буряадаймнай барилдаашан 5:3 гэһэн тоотойгоор шүүжэ гараһан байна.

- Мүнөө жэл яһала һайн үрэ дүнтэйгөөр барилдажа байнаб. Тиимэһээ хэзээ хэзээнэйхиһээ ехээр һорилго хэнэб. Якутск хотодо ерэжэ, суута Дмитрий Коркиной дурасхаалай мүрысөөндэ шүүхэ тухайгаа олон жэлдэ бодомжолжо ябааб. Һанаһандаа хүрэһэндөө ехэ баяртайб. Юуб гэхэдэ, энэ мүрысөөндэ ганса шанга барилдаашад хабаададаг гээшэ, - гэжэ Балдан Цыжипов һанамжаараа хубаалдаа.

Якутск хотодо зорюута ерэһэн Олимпиин чемпион Таха Акгуль манай барилдаашанда түрүү һуури эзэлһэнэй түлөө гол шан барюулаа. Энэ тэнгэриин тэмдэг бэшэ юм гү гээд, Буряадаймнай спортдо дуратайшуул найдана. Юуб гэхэдэ, Турциин тамиршан 125 килограмм хүрэтэр шэгнүүртэ Риодо түрүүлһэн байна.