​Универсальна байлдаан

Медынь (Калужска можо). Буряадай уласай багшанарай колледжын оюутан Даша Раднаев 16-17 наһатай эдиршүүлэй дунда дэлхэйн чемпионадта шалгарба. Тамиршанай һоригшо Леонид Сиратовай хэлэһээр, 70 килограмм хүрэтэр шэгнүүртэ “Хүнгэн универсальна байлдаан” гэһэн һалбарида Даша гурбадахи һуури эзэлээ. Мүн “Классическа универсальна байлдаан” гэһэн һалбарида Даша хабаадахадаа, финалда Узбекистанай тамиршантай ана-мана тулалдабашье, мүнгэн медальда хүртөө.

- Эдэ хоёр һалбари ехэ илгаатай. Нэгэндэнь тамиршад ганса барилдана, харин нүгөөдэдэнь барилдаанһаа гадна, боксын арга дүрэнүүдые хэхэ аргатай, - гэжэ Леонид Сиратов мэдүүлнэ.

Даша Раднаев хадаа өөрын наһанай бүлэгтэ хабартаа Ородой Холбоото Уласай чемпионой нэрэ зэргэдэ хүртэһэнэй түлөө дэлхэйн мүрысөөндэ хабаадалсаба гээшэ. Бүхы дээрээ 25 гүрэнэй 290 тамиршан энэ мүрысөөндэ хабаадаһан байна.