​Буряадай чемпионууд элирбэ

Ородой холбооной можо, хизаарнууд сооһоо манай Буряад Улас футбол наадаха мэргэжэлтэ командагүй гэһэн тоодо оролсоно. Арбаад жэлэй саана “Сэлэнгэ” команда үгы болгогдоо һэн. Харин мүнөө Буряадай футболистнууд һайн дуратайшуулай лигэдэ бэеэ туршана.

Хэды тиигэбэшье, улас доторнай олон тоото мүрысөөн эмхидхэгдэнэ. Эдэ үдэрнүүдтэ эрэшүүлэй дунда Буряад Уласай тэмсээн түгэсэбэ. Эхэнэрнүүд зунайнгаа хаһа мүн лэ дүүргэбэ.

Түрүү һуури эзэлэгшэ элирээ

Һүүлэй хэдэн жэлдэ Буряад Уласай чемпионат заал һаа, саһанай ороһоной удаа түгэсэдэг болонхой. Энэ сагай уларил һүүлшын наадануудта муу нүлөө үзүүлээ ааб даа.

Эрэшүүлэй команданууд эгээл һүүлшын наадан болотор футболдо дуратайшуулай анхарал ехэ татаа. Юуб гэхэдэ, түрүүлһэн команда үшөө элирүүлэгдээгүй байгаа. Тиигэжэ “Основной ресурс” клубай наадагшад ВСГУТУ-гай оюутадые 4:1 гэһэн тоотойгоор шүүжэ, чемпионой нэрэ зэргэдэ хүртөө. “Основной ресурс” хоёрдохи һуури эзэлһэн “Байкалай” командаһаа оройдоол хоёр тоотойгоор урид гараба. Мүрысөөнэй хугасаа соо эдэ команданууд гурба дахин уулзаа, хоёр ушарта “Байкал” илалта туйлаһан байна. Тиимэһээ һүүлшын һуурида гараһан БГСХА-гай командада шүүгдэһэнэйнгөө түлөө “Байкал” чемпион боложо шадабагүй. БГУ-гай футболистнууд гурбадахи шангай һуури эзэлжэ, хүрэл медальда хүртэбэ.

“Байкал” командын добтологшо Валерий Лиханов 15 наадан соо 15 бүмбэгэ сохижо оруулаад, эрхим наадагша гэжэ тодороо.

Энэ жэлэй мүрысөөндэ хэзээнһээ үсөөн, оройдоол зургаан команда наадаа гээд һануулая.

Басагадай бүмбэгэ

Эхэнэрнүүдэй дунда мүрысөөнэй һүүлшын нааданууд октябриин 16-да үнгэргэгдэбэ. Энэ үдэр мүнгэн болон хүрэл медальнуудта хүртэгшэд элирүүлэгдээ.

ВСГУТУ-гай оюутан басагад “Локомотив” командые 6:2 гэһэн тоотойгоор илажа, хоёрдохи һуури эзэлбэ. Мүн “түмэр замшад” гурбадахи һуурида гараа.

Үшөө урда долоон хоногто чемпионой нэрэ зэргэдэ хүртэһэн БГУ-гай басагад “Молодёжка” командые 5:0 гэһэн тоотойгоор шүүһэн байна. Тиигэжэ БГУ өөрынгөө бартаа руу оройдоол нэгэ бүмбэгэ алдаа, өөһэдөө 28 бүмбэгэ ондоо командануудай бартаа руу сохижо оруулаа. Тэдэ ёһотойл чемпионой наада харуулба.