​Буряадай тамиршадай амжалтанууд

Тхэквондо (МФТ)

Будапешт (Унгар). Буряадай тамиршан Дмитрий Петухов дэлхэйн Кубогта хүртэхын түлөө мүрысөөндэ хоёр дахин чемпионой нэрэ зэргэдэ хүртэбэ. Үшөө тиихэдэ командна туль харуулгада гурбадахи һуури эзэлһэн байна.

Буряадһаа уг гарбалтай, Норвегидэ ажаһуудаг Марина Будаевагай басаган Ольсен гурбадахи шангай һуури эзэлээ юм.

Описание: Дмитрий Петухов

Ехэ тулалдаан

Медынь (Калужска можо). 20 наһа хүрөөдүй залуушуулай дунда дэлхэйн чемпионат үнгэргэгдэбэ. Эндэ Буряадаймнай тамиршад һайн үрэ дүн харуулба. Буряад Уласай багшын колледжын оюутан Даша Жамбалов мүнгэн болон хүрэл медальнуудта хүртэбэ. Елена Цыренова хоёр дахин гурбадахи һуури эзэлээ. Мүнөө дээрээ Елена Москвада ГЦОЛИФК-да нэгэдэхи курсда һурана.

Тхэквондо (ИТФ)

Новосибирск. Сибириин холбооной тойрогой нээмэл чемпионат 12-дохиёо үнгэргэгдэбэ. Буряад Уласай түлөөлэгшэд яһала һайн үрэ дүнтэйгөөр хабаадажа ерэбэ. Бүхы дээрэ тэдэ долоон алтан, зургаан мүнгэн, зургаан хүрэл медальнуудые абажа шадаа. Дарья Петрова хоёр дахин чемпионой нэрэ зэргэдэ хүртөө. Анна Мальцева, Дарья Шелопугина болон Денис Паньков өөр өөрын шэгнүүртэ түрүүлһэн байнад. Гурба дахин дэлхэйн чемпион Евгений Оцимик доянг дээрэ гаража, дахинаа хэндэшье диилдэбэгүй.

Тус мүрысөөндэ Ородой 15 можо, хизаарнуудай, Казахстанай 3 можын 780 хүн хабаадаа.

Новосибирск. Заншалта ёһоороо эдэ үдэрнүүдтэ оюутадай дунда Россиин чемпионат үнгэргэгдэбэ. Доянг дээрэ 30 гаран можо, хизаарнуудай 100 гаран тамиршад оролсобо. Буряад Уласые түлөөлһэн уласай олон шэглэлэй колледжын оюутад ялас гэмэ амжалта туйлаба. Тэдэ командна тоосоондо түрүүлжэ гараа. Сибириин болон Ураалай федеральна университедүүдэй команданууд хоёрдохи, гурбадахи һууринуудта гараһан байна.

Буряад тамиршад сооһоо Ангелина Пищалкина хоёр дахин түрүү һуури эзэлһэн байна. Тэрэнэй аха Михаил Пищалкин мүнгэн медальда хүртөө.

Гиир үргэлгэ

Алушта (Крым). Россиин Кубогта хүртэхын түлөө мүрысөөндэ Андрей Рассадин мүнгэн медальда хүртэбэ. Тэрэ 73 килограмм хүрэтэр шэгнүүртэ “толчок” гэһэн шэглэлдэ гиир 123 дахин үргэбэ. Мүн “рывок” гэһэн упражненидэ 151 дахин гиир үргэжэ шадаа. Энэ оройдоол хоёрдохи һуури асараа.

Бүхы дээрээ 43 регионой 210 хүн мүрысөөндэ хабаадаа.

Тайска бокс

Эрхүү. “Алтан ринг” гэһэн нэрэтэй заншалта мүрысөөн 120 гаран тамиршадые суглуулаа. Үбэр Байгалай хизаарай, Буряад Уласай болон Эрхүү можын боксёрнууд табан наһанай бүлэгтэ мүрысэбэ.

Буряадай тамиршад хоёр алтан, дүрбэн мүнгэн болон нэгэ хүрэл медальнуудаар шагнагдаһан байна. Эндэ Роман Казаков болон Павел Леонтьев гэгшэд чемпионой нэрэ зэргэдэ хүртөө. Данил Жевлаков, Амарсан Тарбаев, Роман Бакулин болон Илья Остапенко гэгшэд хоёрдохи һуури эзэлээ. Руслан Казаков шангай гурбадахи һуурида гараа.