​Хэзээ, хаана, юун?

Ноябриин 12.

Улаан-Үдэ хотын 18-дахи кварталда хоккейн талмай нээгдэхэнь. Тус хэмжээ ябуулгада уран гулгалгаар (фигурное катание) дэлхэйн болон Европын чемпионууд Алексей Тихонов болон Мария Петрова гэгшэд ерэхээр хараалагдана.

Үндэр айлшадай ерэлгэ хэдэн шалтагаантай. Ушарынь гэхэдэ, бүхы дэлхэй дээрэ мэдээжэ “Нивеа” гэһэн гоо һайханай фирмэ тус хоккейн талмай бариһан байна. Үшөө хабар “Хара Морин” командын гэшүүд энэ фирмын эмхидхэһэн “Өөрын елүүрэй түлөө дуугаа үгэ!” гэһэн интернет-конкурсдо шүүжэ гараа бэлэй. Энэ хэмжээ ябуулгада бүхы Буряад Уласай ажаһуугшад хабаадаа гэбэл, алдуу болохогүй. Бүхы арад зоной хамтын хүсөөр хоккейн шэнэ талмай бүтэбэ гээшэ.

Энэ талмай үдэр һүнигүй хүдэлхэ гэжэ эмхидхэгшэд хэлэнэ.

Ноябриин 14-17.

Һур харбагшадай үбэлэй шэнэ халаан эхилбэ. Сибириин федеральна тойрогой чемпионадта тамиршад үбэлэй халаанда 18 метр зайда түрүүшынхиеэ харбахань. Энэ хэмжээ ябуулга Улаан-Үдэдэ “Найрамдал” гэһэн КСК-гай байшан соо үнгэргэгдэхэ. Мэргэжэлтэдэй тэмдэглэһээр, Буряад Уласай болон Үбэр Байгалай һур харбагшад шангай олонхи һууринуудые эзэлхэ аргатай. Эрхүү можын болон Тыва Уласай тамиршад мүн лэ медальнуудта хүртэхэ гэжэ багсаамжалагдана.

Ноябриин 18-19.

Буряад Уласай эгээл мэдээжэ барилдаашан Борис Будаев өөрынгөө тусхайта уласхоорондын мүрысөө дахинаа үнгэргэхэнь. Дэлхэйн, Европын, Азиин, СССР-эй чемпионой шангуудта хүртэхын түлөө 17-20 наһатай залуу барилдаашад мүрысэхэ.

Ноябриин 19-20.

Улаан-Үдэ хотын байгуулагдаһаар 350 жэлэй ойн баярай хэмжээ ябуулганууд спортын талмайнууд дээрэ үргэлжэлһөөр. Тиигэжэ тайска боксоор ниислэлэй түрүүшын чемпионат Буряадай гүрэнэй ехэ һургуулиин спортын танхим соо (Куйбышева гудамжа, 1-дэхи байра) үнгэргэгдэхэнь.

Ноябриин 20.

“Пионер” гэһэн худалдаа-зугаасалгын түбтэ скакалкаар һүрэлгөөр Улаан-Үдэ хотын түрүүшын чемпионат болохоор хараалагдана. Хабаадагша бүхэн 30 секундын хугасаа соо скакалкаар һүрэхэ юм. Хэн эгээл оло дахин һүрөөб - тэрэ илалта туйлаха юм. Үдэшын 17 час 30 минутада эхилхэ мүрысөөндэ дуратай хүн хабаадаха аргатай.