​Бэлиг Галановай мүнгэн медаль

Оренбург хотодо үнгэрһэн Ородой Холбооной Уласай боксын чемпионадта Буряад ороной тамиршад амжалтатай хабаадаба.

81 килограммай шэгнүүртэ Бэшүүр аймагһаа гарбалтай Георгий Кушиташвили финалда гарахын түлөө тэмсээндэ Дагестан Уласай Муслим Гаджимагомедовтэ диилдэжэ, хүрэл медальда хүртэбэ. Г. Кушиташвили 2015 оной Самара хотодо үнгэрһэн Ородой чемпионадта түрүү һуури эзэлһэн габьяатай тамиршан юм.

49 килограммай шэгнүүртэ нёдондо жэлэй Ородой Холбооной абарга Батор Сагалуев энэ жэлдэ 3-дахи һуури эзэлбэ. Б.Сагалуев болбол Саха-Яхад Уласай боксёр Василий Егоровто хахад финалай тэмсээндэ диилдээ бшуу.

49 килограммай шэгнүүртэ баһал манай тамиршан Бэлиг Галанов финалай тэмсээндэ Василий Егоровто булигдажа, мүнгэн медальда хүртэбэ. Хэжэнгэ аймагай баатар хүбүүн Б.Галанов болбол гурба дахин Ородой Холбооной чемпионой үндэр нэрэ зэргэдэ хүртэһэн намтартай юм. “Номто” гэжэ спортын клубай тамиршан Б.Галановай һоригшодынь хадаа Бато Батуев, Бато-Мунко Ванкеев гэгшэд болодог. Буряад Уласай Арадай Хуралай депутат Валерий Доржиев “Номто” клубые эбээн тэдхэжэ, хүтэлжэ байдаг юм.

Оренбург хотын рингдэ 273 түрүү боксёрнууд гараһан байна. Энэ тэмсээнэй дүнгөөр Ородой Холбооной суглуулагдамал команда бүридхэгдэдэг заншалтай.

Гэрэл зураг дээрэ: «Номто»бүлгэмэйхид - Бато-Мунко Ванкеев (захирал), Бэлиг Галанов (тамиршан), Валерий Доржиев (президент)