​Арсалан Будожаповай амжалта

Жэлэй эсэстэ Буряадаймнай барилдаашад хэдэн ялас гэмэ амжалтануудые туйлана. Тиигэжэ Баку болон Казахстанай Тараз хотонуудта эмхидхэгдэһэн уласхоорондын мүрысөөнүүдтэ шалгаржа ерээ.

Баку (Азербайджан). Уласхоорондын мүрысөөнүүдэй нэгэн болохо “Голден Гран-при” (“Мемориал Гейдара Алиева”) жэл бүри олон һайн барилдаашадые суглуулдаг. Олимпиин, дэлхэйн, Европын чемпионууд энэ мүрысөөндэ хабаадахаяа хүсэдэг. Энэшье удаа шанга хүбүүд, басагад Бакуда суглараа. Буряадаймнай Балдан Цыжипов болон Нина Менкенова тэрэ тэмсээндэ хабаадажа, шангай һууринуудые эзэлбэ.

125 килограмм хүрэтэр шэгнүүртэ барилдаһан Балдан Цыжипов түрүүшын уулзалгын үедэ Кубын Юденни Естевесые аргагүй үндэр амплитудатай шэдэлгэ хэхэдэнь, 4 балл абажа, илалта туйлаа.

“Бусад уулзалганууд тиимэшье бэлэн бэшэ байгаагүй”, - гэжэ Балдан хөөрэнэ. Белоруссиин бүхэ Вадим Шведовые оройдоол 3:2 гэһэн тоотойгоор шүүгээд, дэлхэйн болон Европын чемпионадуудта шангай һуури эзэлһэн Украинын Ален Засеевтэ 2:4 гэһэн тоотойгоор булигдаа. Шангай гурбадахи һуури эзэлхын түлөө Турциин Юнуса Эмре Деде гэгшые шүүжэ гараа.

Эхэнэрнүүдэй дунда Ородой суглуулагдамал командын бүридэлдэ оруулагдаһан Нина Менкенова шангай хоёрдохи һуурида гараба. 55 килограмм хүрэтэр шанга тулалдаануудта Буряадай барилдааша басаган хоёр Азейрбаджанай, Бразилиин тамиршадые шүүжэ шадаа. Дэлхэйн чемпионадай хүрэл медальда хүртэгшэ, Нигериин Одунайо Адекуоройе манай тамиршанһаа финалда үлүү байжа, түрүү һуури эзэлээ.

Ородой эхэнэрнүүдэй командада Нина Менкенова эгээл һайн дүн харуулһан байна. Ородой Холбооной үшөө табан басагад гурбадахи һуури эзэлээ.

Тараз (Казахстан). Мэдээжэ гүрэнэй болон ниитын ажал ябуулагша Динмухамед Кунаевай мүнхэ дурасхаалда зорюулагдаһан уласхоорондын мүрысөөн түрүү барилдаашадай анхарал ехээр татана. Энэ жэл тус мүрысөөндэ Буряадаймнай барилдааша хүбүүд нэгэ алтан, хоёр хүрэл медальнуудта хүртэбэ гээшэ.

74 килограмм хүрэтэр шэгнүүртэ Арсалан Будожапов түрүү һуури эзэлһэн байна. Ород гүрэнһөө айлшалһан Магомед Хизриев болон Халил Аминов, Казахстанай Александр Гольдман, Грузиин Джумбер Квелашвили гэгшэдые шүүжэ, Арсалан финалда орожо шадаа. Һүүлшын уулзалгада Татарстанай Евгений Лапшовые оройдоол 3:2 гэһэн тоотойгоор илажа гараа. Тиигэжэ Арсалан Будожапов чемпионой нэрэ зэргэдэ хүртэжэ, 5 мянган доллар мүнгэн шанда хүртөө.

70 килограмм хүрэтэр шэгнүүртэ Евгений Жербаев шангай гурбадахи һуури эзэлээ. Таразай хибэс дээрэ тэрэ ганса Лондон хотодо болоһон Олимпиин наадануудай шангай һуури эзэлэгшэ Казахстанай Акжурек Танатаровта 0:1 гэһэн тоотойгоор шүүгдээ.

125 килограмм хүрэтэр шэгнүүртэ Цыбик Максаров шалгаржа, гурбадахи һуури эзэлээ.