​Валерий Бадмаевай дурасхаалда

"Бурятия» сониной түрүүшын ахамад редактор байһан Валерий Базарович Бадмаевай мүнхэ дурасхаалда зорюулагдаһан гиир үргэлгөөр уласай мүрысөөн декабриин 16-да үнгэргэгдэбэ.

Михей Ербановай нэрэмжэтэ Буряадай хүдөө ажахын колледжын спортын байшан соо болоһон мүрысөөндэ хабаадахаяа Загарай, Захаамин, Сэлэнгэ, Хяагта, Тарбагатай, Ярууна, Түнхэн, Байгал шадарай, Ивалга, Кабанск аймагуудай болон Улаан-Үдэ хотын 100 гаран тамиршад сугларба.

“Буряад үнэн” сонинтой үни удаанай харилсадаг, штатнабэшэ сурбалжалагша, Буряад Уластаа, бүхы СССР гүрэнэй байһан дэбисхэр дээрэ мэдээжэ Валерий Манзаракшеевич Сыдеев тус мүрысөө үнгэргэхэ гэжэ дурадхал оруулһан байна.

- Манай нүхэр сурбалжалагша мэндэ ябаа һаа, 2016 ондо 70 наһа гүйсэхэ байгаа. Бүхы наһаараа Валерий Базарович спорт тухай бэшэдэг байгаа. Мүн өөрөөшье спортын элдэб зүйлнүүдээр бэеэ һоригшо һэн. Штанга үргэжэ, тэрэ амжалтануудые туйлаа. Мүнөө спортын энэ зүйл манай Буряадта тиимэшье ехээр хүгжэнэгүй. Тиимэһээ гиир үргэлгөөр мүрысөө үнгэргөө һаа, таарамжатай гэжэ һананабди, - гэжэ Валерий Сыдеев олон тоото хүн зонтой харилсахадаа, хэлэжэ ябаа.

Энэ дурадхал бэелүүлхын түлөө “Буряад үнэн” Хэблэлэй байшан урагшаа һанаатай Валерий Манзаракшеевичтэй хамта олон дэмжэгшэдые олобо. Тус мүрысөө үнгэргэлгэдэ Буряад Уласай Арадай Хуралай һунгамалнууд, Улаан-Үдэ хотын захиргаан, Захаамин аймагай захиргаан, “Ниитэ нэгэ Росси” гэһэн намай Буряадай таһаг, Гиир үргэлгын эблэл туһа хүргэһэн байна. Мүн тиихэдэ Михей Ербановай нэрэмжэтэ Буряадай хүдөө ажахын колледжын коллектив аргагүй ехэ эмхидхэлэй ажал ябуулаа гэжэ хэлэхэ хэрэгтэй.

Автор: Герман Намжилов
Описание: Валерий Манзаракшеевич Сыдеев  "Буряад үнэн" Хэблэлэй байшанай захирал-ахамад редактор Баяр Дашеевич Балдановтай

Түрүүшын мүрысөөндэ ерэһэн Буряад Уласай Толгойлогшо болон Засагай газарай захиргаанай мэдээсэлэй таһагай хүтэлбэрилэгшэ Ирина Смоляк гэгшын хэлэһээр, түүхэдэ үшөө нэгэшье мүрысөөн сурбалжалагшада зорюулагдаагүй юм.

“Ниитэ нэгэ Росси” гэһэн намай Буряадай таһагай хүтэлбэрилэгшэ Михаил Кравченко баярай үгэ хэлэхэдээ, тус хэмжээ ябуулга ехэ политическэ удха шанартай гэжэ тэмдэглэбэ.

“Буряад үнэн” Хэблэлэй байшанай захирал Баяр Балданов олон хүн зонтой энэ мүрысөө эмхидхэхэ тухай хөөрэлдэһэн тухайгаа мэдүүлбэ.

- Маанадтай хөөрэлдэһэн хүнүүд соо нэгэшье үгы гэжэ хэлэһэн хүн байгаагүй. Энээнһээ уламжалан, Валерий Базарович нүхэд соогоо, арад зонойнгоо дунда тон хүндэтэй, ажалдаа бэрхэ хүн байһыень гэршэлнэ, - гэжэ Баяр Балданов һанамжална.

- Тус мүрысөө үндэр хэмжээндэ үнгэргэхэ гэжэ оролдообди. Юуб гэхэдэ, үшөө тамиршан ябахадамни, Валерий Бадмаев гиир үргэлгэ тухай ходо бэшэдэг һэн. Тиигэжэ тэрэ спортын энэ янзые арад зоной дунда дэлгэрүүлжэ шадаа. Тиимэһээ Буряадай бүхы гиир үргэгшэд Валерий Базаровичта баяртай байдаг. Мүрысөө эмхидхэе гэжэ дурадхалай ороходо, хоёр гараа үргэн дэмжээбди, - гэжэ Буряад Уласай суута тамиршан, спортын габьяата мастер Сергей Леонов хэлэнэ.

Хүдөө ажахын колледжын оюутад нээлгын баяр ёһололдо һайхан хатарнуудаараа, дуунуудаараа сугларагшадые баясуулба. Буряад арадайнгаа хубсаһа үмдэһэн эндэхи басагад шан барюулгын үйлэ хэрэгтэ хабаадажа шэмэглээ.

Гиир үргэлгын эблэлэй ахамад һоригшо, уласхоорондын классай спортын мастер Андрей Рассадинай хэлэһээр, энэ мүрысөөндэ эдир тамиршадһаа гадна, томошуулай бүлэгтэ орохоёо байһан залуушуул хабаадаа. Тэдээнһээ гадна һаншаг сагаан наһатайшуулшье мүрысөө.

2002 оной болон бүри бага наһанай хүбүүдэй дунда Максим Кобелев (Түнхэн), Роман Сутурин (Гусиноозёрск), Данил Цвик (Загарай), Родион Викулин (Захаамин) гэгшэд түрүү һууринуудые эзэлээ.

Тэдээнһээ нэгэ бага аха хүбүүдэй дунда Данил Мажаев (Ярууна), Данил Фёдоров, Игорь Каташов (хоюулаа Хяагта), Вадим Шевцов (Загарай) дүрбэн нэгэдэхи һуурида гараа.

1998-1999 оной залуушуулай дунда Роман Якушев (Хяагта), Дмитрий Евсюков (Загарай), Сергей Каргин (Кабанск) болон Денис Васильев (Хяагта) түрүүлжэ, Буряад Уласай һоригшодой анхарал татаба.

Басагадшье хүбүүдһээ дутуу бэшээр гиир үргэдэг байһанаа харуулба. Энэ мүрысөөндэ хабаадаһан 21 басагадай дунда өөр өөрынгөө шэгнүүртэ Марина Барановская (Гусиноозёрск), Анна Вагина ба Елена Воробьёва (хоюулаа Хяагта) гэгшэд шалгараа.

“Ниитэ нэгэ Росси” намай Буряадай таһаг түрүүлһэн командануудта шангуудые барюулаа. Сэлэнгэ, Загарай болон Хяагта аймагуудай тамиршад шангай һууринуудые эзэлээ.

50-һаа дээшэ наһатай ветерануудай дунда Байгал шадарай аймагай һоригшо, спортын мастер Юрий Галичкин түрүүлжэ гараа. 69 наһатай мэдээжэ тамиршан Юрий Иванович Воеводин (Загарай) хоёрдохи һуури эзэлжэ, олон сугларагшадые гайхуулаа. Мүн Хяагтын һоригшо Владимир Алексеев хүрэл медальда хүртэбэ.

40-50 наһанай бүлэгтэ баһа Байгал шадарай аймагай һоригшо Юрий Теслев түрүүлһэн байна. Түнхэн аймагай “Туран” гэһэн хүдөөгэй захиргаанай толгойлогшо Владимир Хармакшанов хоёрдохи һуури эзэлээ. Гурбадахи һуурида Улаан-Үдын Артур Фёдоров гараа.

Мүрысөө эмхидхэгшэдэй мэдүүлһээр, тус хэмжээ ябуулга жэл бүри үнгэргэгдэдэг, заншалта болохоор хараалагдана. Энэ мүрысөөн 2017 оной нэгэдэмэл түсэбтэ оруулагдаа гэжэ Сергей Леонов тэмдэглэбэ.

Автор: Герман Намжилов
Описание: Шагналгын үедэ