885
Гараад байгаа 2017 ондо Буряадаймнай барилдаашад түрүүшын мүрысөөндэ хабаадажа, амжалтануудые туйлаад, спортдо дуратайшуулые баясуулба. Үнгэрһэн долоон хоногой эсэстэ Красноярск хотодо эмхидхэгдэһэн суута Дмитрий Миндиашвилиин нэрэмжэтэ Барилдаанай академиин шангуудта хүртэхын түлөө Бүхэроссиин мүрысөөндэ тэдэ юһэн медаль абажа шадаа.
Барилдаагаар Буряад Уласай гүрэнэй һоригшо Юрий Сандаковай хэлэһээр, Красноярскда болоһон мүрысөөндэ нютагаймнай олон тамиршад хабаадаха гэжэ оролдобо. Ушарынь гэхэдэ, тус хэмжээндэ түрүү һууринуудые эзэлэгшэд “Голден Гран-при “Иван Ярыгин” гэһэн уласхоорондын мүрысөөндэ хабаадаха эрхэдэ хүртэхэ аргатай байгаа.
Тиигэжэ Буряадаймнай барилдаашад гурбан алтан медаль абаба. Yнинэй түрүү һуури эзэлээгүй Жаргалма Цыренова 60 килограмм хүрэтэр шэгнүүртэ чемпионой нэрэ зэргэдэ хүртөө. Мүрысөөнэй түрүүшын үдэр 125 килограмм хүрэтэр шэгнүүртэ оройдоол 5-дахи һуури эзэлһэн Цыбик Максаров январиин 15-да томошуулай дунда абсолютна чемпионой нэрэ зэргын түлөө тулалдахадаа, амжалта туйлажа, Иван Ярыгинай нэрэмжэтэ уласхоорондын мүрысөөндэ барилдаха эрхэтэй болобо.
61 килограмм хүрэтэр шэгнүүртэ Булат Батоев түрүүлһэн байна. Эндэ Баяр Цыренов болон Эрхүү можын Юлиан Гергенов гэгшэд хүрэл медальда хүртэбэ.
55 килограмм хүрэтэр шэгнүүртэ Наиля Абзалова финалда шүүгдэжэ, шангай хоёрдохи һуури эзэлээ. Саяна Цыбикова, Алёна Сангадиева, Валерия Суворова болон Солбон Тумэнбаяров гэгшэд гурбадахи һуурида гараа.
Мүнөө жэлэй “Голден Гран-при “Иван Ярыгин” гэһэн уласхоорондын мүрысөөн январиин 27-29-нэй үдэрнүүдтэ болохоор хараалагдана. Шэлэн абалгын шата дабангүй тус мүрысөөндэ хабаадаха Ородой тамиршадые Спортын барилдаанай федераци һаяхан нэрлэбэ. Эндэ 107 эрэшүүл оролсоно. 2016 ондо тэдэ булта Ородой чемпионат болон Кубогта, уласхоорондын мүрысөөнүүдтэ, Европын болон дэлхэйн тэмсээнүүдтэ, Олимпиин наадануудта амжалтатайгаар хабаадаһан хүнүүд гээшэ.
Александр Богомоев, Алдар Бальжинимаев, Даша Шарастепанов, Евгений Жербаев, Алексей Сабидаев, Арсалан Будажапов, Юрий Власко, Балдан Цыжипов гэгшэд Буряадай барилдаашад сооһоо эндэ хабаадаха юм.
Ородой суглуулагдамал командын ахамад һоригшо Юрий Шахмурадовай хэлэһээр, Красноярскын хибэс дээрэ манай Ирина Ологонова гаража шадахагүй. Ушарынь гэхэдэ, дэлхэйн чемпионадуудта гурба дахин мүнгэн медальда хүртэһэн Буряадай урдаа хараха барилдааша басаган баруун хүлэйнгөө үбдэгтэ операци хүүлээ. Тиимэһээ май һарада үнгэргэгдэхэ Европын чемпионадташье хабаадахагүй юм.
Автор: Борис БАЛДАНОВ
