​Түрүү тамиршад хүсөө гэршэлээ

Январиин 20-22 үдэрнүүдтэ Улаан-Үдэ хотодо Буряад Уласта һур харбалгын эхи табигшадай нэгэн, профессор Борис Сандановай мүнхэ дурасхаалда зорюулагдаһан Бүхэроссиин мүрысөөн үнгэрбэ.

Энэ заншалта мүрысөөндэ манай хүршэнэр, Үбэр Байгалай хизаарай болон Эрхүү можын тамиршад, ерэжэ шадаагүй. Тиимэһээ тус хэмжээ ябуулга Буряад Уласай чемпионат гэжэ тоологдоо. Тиигэбэшье 18 метр зайда аяар 347 хүн харбаба.

Һур харбалгаар гүрэнэй һоригшо Эрдэм Жигжитовэй хэлэһээр, олон хабаадагшад тус мүрысөө шэмэглээ. 

“Суглуулагдамал командын бүридэлдэ шэлэн абалга боложо байна. Февраль һара соо манай залуу тамиршад болон мэдээжэ харбагшад Орел, Великие Луки гэжэ хотонуудта үнгэргэгдэхэ мүрысөөнүүдтэ ошохо. Тэндэ шалгараа һаа, Ородой командын бүридэлдэ оруулагдажа, Европын чемпионадта хабаадаха эрхэтэй болохо”, - гэжэ Эрдэм Жигжитов хэлэнэ.

Классическа түхэлэй номо һуршаар харбалгада Баир Цыбекдоржиев түрүүлжэ гараа. Тэрэ һүүлшын уулзалгада Василий Ринчиное шүүбэ. Гурбадахи һуури эзэлхын түлөө аха дүү Бальжинима болон Бэлигтэ Цыремпиловтэн мүрысэбэ. Эндэ суута харбагшын дүү хүбүүн хүрэл медальда хүртэбэ. Эхэнэрнүүдэй дунда Виктория Будаева (дээрэхи гэрэл зураг дээрэ) түрүүлбэ. Наталья Эрдыниева хоёрдохи һуури эзэлээ. 2016 оной Олимпиин наадануудта мүнгэн медальда хүртэһэн Инна Степанова гурбадахи һуурида гараба.

Борис Балдановай гэрэл зураг

Баир Цыбекдоржиев

Блочно түхэлэй номо һуршаар эрэшүүлэй дунда Данзан Халудоров чемпион боложо тодороо. Андрей Бадлуев болон Сергей Шенхоров гэгшэд шангай удаадахи һууринуудые эзэлээ. Эрэмдэг бэетэйшүүлэй дунда харбадаг Татьяна Андриевская нэгэдэхи һуурида гараа. Дарья Догарь болон Иринчима Шобоева гэгшэд мүнгэн ба хүрэл медальда хүртэбэд.

- 2016 ондо Татьяна Андриевская уласхоорондын классай спортын мастер болохо аргатай байгаа, бүхы нормонуудые тэрэ дүүргээ. Манай Буряад Уласта эрэмдэг бэетэйшүүлэй спортын федерациин үгы дээрэһээ тэрэ үндэр нэрэ зэргэдэ хүртэбэгүй, - гэжэ һоригшо Цыденбал Цыренжапов хэлэнэ.