​Жаргалма Цыренова: "ХҮРЭЛ МЕДАЛЬ АБАҺАНДАА БАЯРТАЙБ"

Красноярск хотодо үнгэрһэн долоон хоногой эсэстэ барилдаагаар “Ал­тан Гран-при “Иван Яры­гин” уласхоорондын мүрысөөн түгэсэбэ. Эдэ тулалдаануудта Буряадай Жаргалма Цыренова 3-дахи һуури эзэлжэ хүрэл медальда хүртэбэ.

Барилдаашадай жэл нээдэг энэ мүрысөөниие мэргэжэлтэд дэмы “дэлхэйн бага чемпионат” гэжэ нэрлээгүй. Красноярскын хибэс дээрэ 209 эрэшүүл болон 138 эмэг­тэй тамиршад гараа. Тэдэнэй тоодо олимпиин абарганууд болон шангай һуури эзэлэгшэд, дэлхэйн, Европын, Америкын, Африкын, Азиин мүрысөөнүүдтэ түрүүлһэн барилдаашад хабаадаа.

Буряад Уласай 22 тамиршан Красноярскда барилдаа. Ган­сал Жаргалма Цыренова шал­гарба гээшэ. Тэрэ 60 килограмм хүрэтэр шэгнүүртэ дүрбэн уулзал­га үнгэргөө. Белоруссиин Мади­на Сидакова болон Ород гүрэнэй Наталья Федосеева гэгшэдые шүүжэ гараад, хахад финалда Японой Катцуки Сакагами гэгшэ­тэй уулзаа. Энэ тулалдаан яһала һонирхолтойгоор үнгэржэ, Наран мандаха Уласай барилдааша баса­ган 9:6 гэһэн тоотойгоор илалта туйлаба. Гурбадахи һуури эзэлхын түлөө Жаргалма Монголой Баатар­жав Шоовдор гэгшые шүүжэ гараа.

- Түрүүшын һуури эзэлхэб гэжэ ехэ найдааб. Теэд хүрэл медальда хүртэhэндөөшье баяртайб. Январь соо Красноярскда үнгэрһэн Бүгэдэ Ород гүрэнэй мүрысөөндэ нэгэдэ­хи һуури эзэлһэн байнаб. Удаань хоёр долоон хоног соо яһала һайн бэлэдхэл гараабди. Мүнөө гэртээ бусажа, алдуунууд дээрээ хүдэлхэб, үшөө эршэтэйгээр һорилго хэхэ зо­рилго урдаа табинхайб, - гэжэ Жар­галма Цыренова хөөрэнэ.

Эхэнэрнүүдэй дунда мүрысөөндэ Японой тамиршад дүрбэн алтан медальда хүртөө. Монголой барил­даашад хоёр түрүү һуури эзэлээ. Америкын Холбоото Штадуудай бо­лон Кыргызстанай басагад нэгэ-нэ­гэ алтан медаль абажа шадаа.

63 килограмм хүрэтэр шэгнүүртэ Монголой Орхон Пурэв­дорж һүүлшын уулзалгада Ород гүрэнэй Инна Тражуковае илажа гараа. Монголой энэ басаган 2016 ондо Красноярскда Японой тамир­шан, Олимпиин гурба дахин чем­пион Каори Ито гэгшые шүүһэн намтартай. Тиигэжэ Орхон Пурэв­дорж дэлхэйн барилдаанай одон болотороо ургаһанаа үшөө дахин гэршэлбэ.

75 килограмм хүрэтэр шэгнүүртэ Монголой үшөө нэгэ барил­дааша Уртнасан Ган-Очир хибэсэй эзэн Алёна Стародубцевае шүүжэ, чемпионой нэрэ зэргэдэ хүртэбэ.

Эрэшүүлэй дунда Дагестанай барилдаашад табан алтан медаль абаа. Эдэ хэд бэ гэбэл, Заур Угуев, Ахмед Чакаев, Ильяс Бекбулатов, Ахмед Гаджимагомедов, Даурен Куруглиев гэгшэд болоно. Амери­кын Холбоото Штадуудай Кайл Снайдер, Красноярскын Исраил Касумов болон Хойто Осети-Ала­ни Уласай Алан Хугаев гэгшэд­тэ үлэһэн гурбан алтан медаль хүртэбэ.

Буряадай барилдаашад энэ мүрысөөндэ бирагүйдэбэ гээшэ. Тиигэбэшье, табадахи һуури эзэлһэн Ульяна Тукуренова, Анна Щербако­ва, Стальвира Оршуш болон Булат Батоев гэгшэдые тэмдэглэмээр байна.