​Зунай хаһын эхин

Апрелиин 11-16-ай үдэрнүүдтэ Алушта хотодо эмхидхэгдэһэн һур хар­балгаар Ород гүрэнэй чемпионадта Буряадай тамир­шад хоёр медальда хүртэбэ. Энээнһээ гадна суута Бальжи­нима Цыремпилов болон На­талья Эрдыниева хоёр Ород гүрэнэй рекорд харуулба.

Зунай хаһые эхи табиһан энэ мүрысөөндэ Ородой Холбооной 31 можо нютагай 247 тамиршан хабаадаба.

Тэдэ үдэрнүүдтэ һайн ула­рил тогтожо, энэ мүрысөөндэ хабаадаһан олон тамиршад һайн дүнгүүдые харуулаа. Ородой спортын мастерай нэрэ зэргэдэ хүртэгшэдэй дунда Буряадайшье харбагшад байгаа. Тэрэ тоодо мэ­дээжэ дуушан Дарима Цырендон­доповае нэрлэмээр. Тэрэ блочно түхэлэй номо hуршаар харбаха­даа, 1346 очко абаа.

Классическа түхэлэй номо һуршаар харбалгада залуу та­миршан, Түнхэн аймагай Аршаан һууринай Виктория Харитонова уласхоорондын хэмжээнэй дүн харуулаа. Тиигэжэ Буряадаймнай элитэ тамиршад баһа шалгарба. Суута харбагша, 42 наһатай Баль­жинима Цыремпилов 50 метр за­йда харбахадаа, 347 очко абажа, залуу наһандаа туйлаhан рекор­доёо шэнэлбэ. Спортын габья­ата мастер Наталья Эрдыниева түрүүшын шатын дүнгөөр Ородой рекордсмен боложо шадаа. Тэрэ 1370 очко абаба. Мүн эрэшүүлэй дунда Үбэр Байгалай хизаарай Галсан Базаржапов рекорд хару­улаа.

Буряадай тамиршад һур хар­балгын тусхай танхим үгышье һаа, иимэ һайн дүнгүүдые харуул­ба гээшэ.

Хубиин тоосоондо Бальжини­ма Цыремпилов гурбадахи һуури эзэлхын түлөө тулалдаанда өөрһөөн 24 наһа дүү Үбэр Бай­галай хизаарай Зоригто Жарга­ловые илажа гараа. Эндэ Сверд­ловско можын Виталий Попов Ородой чемпион боложо тодо­роо.

Эхэнэрнүүдэй дунда Үбэр Бай­галай хизаарай Саяна Цыремпи­лова шангай гурбадахи һуурида гараа. Түрүүшын һуури Ростовско можын Елена Осипова эзэлээ. Бу­ряадаймнай Татьяна Бильтрико­ва болон Виктория Будаева гэг­шэд 5-дахи, 8-дахи һууринуудта гараба.

Блочно номо hуршаар харбал­гада Буряад оронһоо уг гарбал­тай Виктория Бальжанова болон Виктор Калашников гэгшэд шан­гай хоёрдохи һуурида гараа. Тэдэ мүнөө Ямало-Ненецкэ тойрогой түлөө мүрысэнэ.

Командна тоосоондо Бальжи­нима Цыремпилов Наталья Эр­дыниева хоёр чемпионуудай нэрэ зэргэдэ хүртөө. Тэдэ Свердловско можын Виталий Попов болон Ксе­ния Перова гэгшэдые финалда илажа шадаа. Эндэ Үбэр Байга­лай хизаарай Галсан Базаржапов болон Туяна Дашидоржиева хоёр гурбадахи һуури эзэлээ.