​Бархан уула тахилгын наадан

Майн 19-20-ой үдэрнүүдтэ Баргажанай голдо ехэ удха шанартай үйлэ хэрэг үнгэргэгдэбэ. Эндэхи ехэ тахилгатай газарнууд болохо Бархан буурал баабайда, Янжама бурханда мүргэлнүүдтэ олон тоото хүн зон хабаадаа. Гадна “Эрын гурбан наадан” эндэ эмхидхэгдэбэ. 

Буддын шажанай заншалта Сангхын Бандида Хамба лама Дамба Аюшеевэй үүсхэлээр иимэ ехэ хэмжээ ябуулгануудай үедэ заал һаа тамирай талаар мүрысөөнүүд үнгэргэгдэнэ. Бархан уулын хормойдо тамиршад һайн барилдаа харуулаа, мэргэнээр харбаа. 

Барилдаагаар мүрысөөндэ үхибүүд юһэн шэгнүүртэ арга шадалаа харуулаа. Энэ тахяа жэлдэ 12 наһа хүрэжэ ябаһан хүбүүдэй дунда мүрысөөн олоной анхарал татаа. Ушарынь гэхэдэ, тэдэ анха түрүүшынгээ мүрысөөндэ хабаадажа байна бшуу. Бүхы дээрээ 150 гаран эдиршүүл зүлгэ ногоон дээрэ гараа. Хурамхаанай болон Баргажанай дасануудай түлөөлэгшэд түрэл нютагтаа шангай олон һууринуудые эзэлжэ, аха дүүнэрээ баясуулаа. Эгээ бага наһатай хүбүүдэй дунда Түгнын дасанай Бэлигтэ Нимаев бэеэр хэды багашье hаа, түрүү һуури эзэлжэ шадаа. Шангай һууринуудые Санагын дасанай Энхэ Ширапов болон Баргажанай дасанай Слава Бубеев гэгшэд эзэлһэн байна. Ехэшүүлэй дунда Хурамхаанай дасанай Алексей Раднаев болон Саян Гармаев гэгшэд нэгэдэхи һууринуудта өөр өөрынгөө шэгнүүртэ гараа. Талмайн эзэд бүхы алтан медальнуудые абаха аргатай байгаа. Теэд Агын дасанай түлөөлэгшэ Балдан Цыжипов финальна уулзалгада Хурамхаанай дасанай Марк Дарижаповай нюрга шоройдуулһан байна. 

Һур харбагшадай дунда эхэнэрнүүдэй дунда шалгарһан Хурамхаан аймагай Софья Халудорова “түрэһэн нютагтаа ерэжэ, мүргэжэ, үшөө тиихэдэ түрүүлжэ байхадаа, зосоомни наран гарана” гэжэ тэмдэглээ. Эрэшүүлэй дунда Агын дасанай түлөөлэгшэ Гонгор Тучинов нэгэдэхи һуурида гараа. Баһа Ага нютагай Баярта Гармаев абсолютна чемпионой нэрэ зэргэдэ хүртөө. 

Хоёрдохи үдэрынь Янжама бурханда мүргэлэй удаа заншалта ёһоороо спортын мүрысөөнүүд болобо. Барилдаанай бага шэгнүүртэ Хурамхаанай дасанай Алексей Раднаев дахин илалта туйлажа гараба. Мүн тиихэдэ нютаг дээрээ байһан Баргажанай дасанай түлөөлэгшэ Иван Гармаев дундуур шэгнүүртэ түрүүлһэн байна. Агын бүхэ Цыбик Максаровые шүүхэ хүн энэ үдэр ехэ шэгнүүртэнэй дунда олдоогүй. 

Һур харбалгаар мүрысөөн баһал һонирхолтой байгаа. Энэ һайндэртэ эрэшүүл, эхэнэрнүүд оройдоол нэгэ түрүүшын шангай түлөө мүрысөө. Түрүүшын һууринуудые эндэ ганса эрэшүүл эзэлээ ааб даа. Хэжэнгын дасанай Эрдэни Дарибазарон чемпионой нэрэ зэргэдэ хүртөө. Сээжэ Бургалтайн түлөөлэгшэ Бэлигтэ Цыремпилов абсолютна мэргэн боложо тодороо. 

Иимэ һонирхолтойгоор Баргажанай голдо тамирай талаар мүрысөөнүүд үнгэргэгдэбэ гээшэ.

Борис Балдановай гэрэл зураг

Шагналгын үедэ