​Тамирай тобшо һонин

Һур харбаан

Улаан-Үдэ. Июниин 22- 26-ай үдэрнүүдтэ манай ниислэл хотодо эрэмдэг бэетэйшүүлэй дунда Ородой чемпионат түрүүшынхиеэ үнгэргэгдэхэнь. 

Мэдээжэ һоригшо Цыденжап Цыренжаповай хэлэһээр, энэ мүрысөөндэ тус спортын зүйлөөр Ородой түрүү паралимпиин тамиршад хабаадахаар хараалагдана. Бүхы дээрээ 18 можо, хизаарнуудай түлөөлэгшэд Улаан-Үдэ ерэхэ. 

Хүл муутай тамиршадһаа гадна нюдэ муутай тамиршад мүрысөө үнгэргэхэ. Эдэнэй дунда чемпионат анха түрүүшынхиеэ эмхидхэгдэхэнь гээд тэмдэглэе.

Буряадай тамиршад яһала һайнаар бэлдэжэ байна. Тэдэ үдэр бүри хоёр дахин һорилго хэнэ.

Футбол 

Улаан-Үдэ. Һайн дуранай командануудай дунда Ород гүрэнэй чемпионат үргэлжэлһөөр. Эндэ наададаг “Бурятия” команда өөрынгөө талмай дээрэ хоёр уулзалга үнгэргэбэ. 

2016 оной“ Сибирь” бүлэгтэ түрүү һуури эзэлһэн Красноярскын “Рассвет-Реставрация” команда Улаан- Үдын футболистнуудые 1:0 гэһэн тоотойгоор илажа гараа. “Бурятия” команда нааданай һүүлшын, 90-дэхи минутада бартаа руугаа бүмбэгэ алдаа гээд хэлэлтэй. 

Удаадахи уулзалгада Барнаул хотын “Полимер” командые талмайн эзэд 3:0 гэһэн тоотойгоор шүүһэн байна. Тус уулзалгада хоёр бүмбэгэ сохижо оруулһан Алексей Рябованов мүрысөөнэй эгээл олон гол оруулhан добтологшо болобо. 

Июниин 14-дэ “Бурятия” команда Красноярскда Сибириин Кубогай түлөө наада үнгэргэхэ. Июниин 16-да Новосибирск, июниин 18-да Кемерово хотонуудта наадаха. 

Барилдаан 

Каспийск (Дагестан). Эхэнэрнүүдэй дунда Ород гүрэнэй чемпионадта Буряадай тамиршад табан медальда хүртэбэ. 

53 килограмм хүрэтэр шэгнүүртэ Стальвира Оршуш түрүү һуури эзэлжэ шадаа. 2017 оной Европын чемпионадта мүнгэн медальда хүртэһэн Хакасиин Наталья Малышевае буряад барилдаашан 11:10 гэһэн тоотойгоор шүүжэ гараба. 

Шангай хоёрдохи һуури Нина Менкенова болон Анжела Катаева гэгшэд эзэлээ. Анжела Катаева хадаа Хойто Осети-Алания Уласай түлөө хабаадана бшуу.

Ульяна Тукуренова болон Вероника Чумикова гэгшэд хүрэл медальнуудта хүртөө. 

Стальвира Оршуш

Борис Балдановай гэрэл зурагууд