​Тамирай тобшо һонин

Тхэквондо (МФТ) 

Польшын Люблин хотодо үнгэргэгдэһэн Европын Кубогта хүртэхын түлөө мүрысөөндэ Буряадаймнай 7 тамиршад амжалтатайгаар хабаадаба. Бүхы дээрээ 22 гүрэнэй 750 гаран хүн эндэ хабаадаа. Милена Гэн 10-12 наһатай үхибүүдэй дунда алтан болон хүрэл медальнуудые абажа шадаа. Бусад тамиршад шангай нэгэ-нэгэ һуури эзэлээ. Денис Мнацаканов, Вера Белых, Алина Башкатова гэгшэд өөр өөрын наһанай бүлэгүүдтэ хүрэл медальнуудта хүртөө. Ехэшүүлэй дунда Елена Харжеева түрүү һуури эзэлжэ, Европын Кубок абаба. 

Футбол 

Красноярск–Новосибирск–Кемерово. Эдэ гурбан хотодо Улаан-Үдын “Бурятия” гэһэн команда ээлжээтэ наадануудаа үнгэргэбэ. Красноярскын “Енисей - М” командатай Буряадай футболистнууд Сибириин Кубогта хүртэхын түлөө наадаһан байна. Талмайн эзэд 6:0 гэһэн тоотойгоор “Бурятия” командые шүүжэ гараа. Эдэ команданууд үшөө нэгэ наада июлиин 7-до Улаан-Үдэдэ үнгэргэхэ. Һайн дуранай командануудай дунда чемпионадай нааданда Новосибирск хотын “Сибирь-М” командатай “Бурятия” 2:2 гэһэн тоотойгоор тэнсэбэ. Эндэ Андрей Белобородов хоёр бүмбэгэ сохижо оруулаа. Кемерово хотодо “СДЮСШОР-Кемерово” командада 0:1 гэһэн тоотойгоор “Бурятия” булигдаа. Ээлжээтэ наадаяа “Бурятия” команда Эрхүү хотодо июниин 30-да үнгэргэхэ юм. 

Шатар 

Сочи. Улаан-Үдэ хотын 19-дэхи һургуулиин эдир шатаршад “Сагаан тэргэ” гэһэн бүхэроссиин мүрысөөнэй һүүлшын шатада хабаадажа, 97 команда сооһоо 21-дэхи һуури эзэлээ. Хоёрдохи хюлгэ дээрэ наадаһан Эрдэм Хубукшанов һайн наада харуулжа, шангай гурбадахи һуури эзэлээ. Абажа боломоор 9 очкогой 7,5-е Эрдэм абаһан байна. 

Эрдэм Хубукшанов

Махачкала хотын Эльдар Магомедов болон Пятигорск хотын Арман Бабаян гэгшэд түрүү хоёр һуури эзэлээ. 19-дэхи һургуулиин командын бүридэлдэ Эрдэм Хубукшановһаа гадна Леонид Семенов, Георгий Тюгашев болон Марина Семенова гэгшэд оролсоһон байна. Һүүлэй хэдэн жэлэй туршада “Сагаан тэргэ” мүрысөөн нээмэл түхэлтэйгөөр эмхидхэгдэнэ. Тиимэһээ мүнөө жэлэй наадануудта Инди, Армени, Греци, Англи, Румыни, Монгол, Кыргызстан, Хитад, Казахстан, Молдово, Эстони, Польшо, Беларусь, Словаки, Израиль, Латви, Болгари гүрэнүүдэй эдир шатаршад Сочидо бууһан байна. Мүрысөөнэй дүнгүүдээр Инди гүрэнэй хүбүүд, басагад чемпионой нэрэ зэргэдэ хүртөө. Армениин шатаршад хоёрдохи һуурида гараа. Шангай гурбадахи һуури Екатеринбург хотынхид эзэлһэн байна. 

Һур харбаан 

Ольбия (Итали). Европын Кубогта хүртэхын түлөө мүрысөөндэ Сергей Хутаков хоёр медальда хүртэбэ. Эрэмдэг бэетэй тамиршадай дунда эмхидхэгдэһэн энэ мүрысөөндэ 20 гаран гүрэнэй тамиршад хабаадаа гээд хэлэлтэй. Командна микст тоосоондо Сергей Хутаков Краснодарай Светлана Баранцеватай харбаһан байна. Тэдэ Итали гүрэнэй тамиршадые финалда шүүжэ, түрүү һуури эзэлээ. Хубиин тоосоондо Сергей Хутаков гурбадахи һуурида гараа. 

Мүрысөөнэй үедэ