960
Мүнөөдэр, июниин 27-һоо эхилжэ, июлиин 1 болотор Улаан-Үдын тамирай-спортын байшанда мэдээжэ боксёр Велингтон Баранниковай дурасхаалда зорюулагдаһан Бүхэроссиин “Байгал-2017” гэһэн “А” классай турнир үнгэргэгдэхэ юм.
Энэ хэмжээ ябуулгада Буряад Уласай Толгойлогшын уялгануудые дүүргэгшэ Алексей Цыденов хабаадалсаха.
Буряад Уласай Хүндэтэ эрхэтэн, суута тамиршан, СССР-эй габьяата спортын мастер, 1964 ондо Токио хотодо үнгэргэгдэһэн Олимпиин наадануудта мүнгэн медальда хүртэһэн, Европын чемпион Велингтон Баранниковай дурасхаалда зорюулагдаһан Бүхэроссиин заншалта болоһон турнирта Ородой Холбоото Уласай можо нютагуудай болон хари гүрэнүүдэй боксёрнууд хабаадаха юм. Москва хотоһоо, Эрхүү, Новосибирск, Кемерово, Амурск, Москвагай, Үбэр Байгалай, Красноярска, Приморско, Хабаровска хизаарнуудай, Саха (Яхад) уласай эгээл шанга тамиршад энэ турнирта мүрысэхэ. Тиихэдэ Монгол гүрэнэй боксёрнууд ерэжэ, энэ мүрысөөндэ хаба шадалаа туршаха.
Буряад Уласай тамиршадай команда 40 хүнһөө бүридэнэ. Батор Сагалуев, Доржо Раднаев, Георгий Кушиташвили, Егор Просянников, Наталья Щадрина болон бусад уласаа түлөөлхэ юм.
Бүхэроссиин турнирта 1998-1977 онуудой болон аха зон спортын мастерта кандидат гэһэн нэрэ зэргэтэй тамиршад хабаадаха аргатай. Эрэшүүл арбан, эхэнэрнүүд гурбан шэгнүүртэ мүрысэхэ.
Мүнөөдэр турнир нээлгын баяр ёһолол үдэшын 17 сагта үнгэргэгдэхэ юм. Удаань июниин 28 –һаа мүрысөөн эхилжэ, июлиин 1-дэ түгэсэхэ. Мүрысөөнэй үдэрнүүдтэ үглөөнэй 8-һаа 9 болотор тамиршад бэеэ шэгнэхэ юм. Тиихэдэ июниин 28-да үдэрэй 15 сагһаа, июниин 29-30-най үдэрнүүдтэ үдэрэй 14 сагһаа, июлиин 1-дэ үдэрэй 12 сагһаа хойшо боксёрнууд хаба шадалаа туршалсаха юм.
Июлиин 1-дэ түгэсхэлэй шата үнгэргэгдэхэ.
