1053
Июниин 22-26-най үдэрнүүдтэ Буряад Уласта эрэмдэг бэетэй зоной хоорондо һур харбалгаар Ородой Холбоото Уласай чемпионат уласай Түб стадион дээрэ үнгэргэгдэбэ.
Энэ мүрысөөндэ Ородой Холбоото Уласай 16 можо нютагуудай 71 тамиршан хабаадаһан байна.
Буряад Уласые дэлхэйн, Европын болон Ородой Холбоото Уласай мүрысөөнүүдтэ илагшад, мэргэн һур харбагшад түлөөлөө. Нэрлэбэл,
Сергей Хутаков – Уласхоорондын спортын мастер, Паралимпиин наадануудай программада оруулагдаһан Бүхэроссиин мүрысөөнүүдтэ илагша, командын бүридэлдэ дэлхэйн чемпион, Дэлхэйн Кубогой мүнгэн медальда хүртэһэн, Ородой Холбоото Уласай 3 удаа чемпион болоһон;
Ирина Баторова – Уласхоорондын спортын мастер, Лондон хотодо үнгэргэгдэһэн Олимпиин наадануудта хабаадагша, дэлхэйн, Европын Чемпионадуудай мүнгэн шанда хүртэһэн, Ородой Холбоото Уласай чемпион болоһон;
Татьяна Андреевская – спортын мастер, Европын чемпион, Европын чемпионадта командын бүридэлдэ мүнгэн медальда хүртэһэн, Дэлхэйн Кубогто командын бүридэлдэ илагша, Ородой Холбоото Уласай чемипонадта оло дахин илаһан;
Александр Дорофеев – спортын мастерта кандидат, Дэлхэйн Кубогой командын бүридэлдэ илагша, Ородой Холбоото Уласай хүрэл медальда хүртэгшэ.
Мүрысөөнэй дүнгүүдээр Буряад Уласай суглуулагдамал команда 4 алтан, 3 мүнгэн болон хүрэл медальда хүртэһэн байна. Сергей Хутаков, Ирина Баторова, Татьяна Андриевская болон Бадма Хаминдаев гэгшэд алтан медальнуудые абаба.
Ородой Холбоото Уласай суглуулагдамал командын ахалагша һоригшо Виктор Сапуновой хэлэһэнэй ёһоор, энэ мүрысөөн сентябрь һарада Пекин хотодо үнгэргэгдэхэ дэлхэйн чемпионадта бэлэдхэл болобо.
