​Һур харбагшадай амжалтанууд

Улаан-Үдэ болон Орёл хотонуудта үнгэргэгдэһэн Ород гүрэнэй хоёр чемпионадта Буряадаймнай тамиршад ялас гэмэ амжалта туйлаба. 

Эрэмдэг бэетэйшүүлэй тулалдаан 

Хүл муутай болон хараа муутай тамиршадай дунда мүрысөөн Улаан-Үдэдэ үнгэргэгдэбэ. Ородой 16 нютаг можонуудай тамиршад манай ниислэлдэ буугаа. Тус мүрысөөн үндэр хэмжээндэ үнгэрөө гэжэ хэлэхэ хэрэгтэй. Санкт-Петербург хотын тамиршад энээн тухай интернет соо бэшэhэн байна. Мүн бусадшье нютагуудhаа ерэhэн айлшад мүрысөө эмхидхэгшэдэй хүндэмүүшэ зан тэмдэглэнэ. 

- Манай баруун нютагуудта зун болохоёо болёо. Улаан-Үдэдэ ерэжэ, наранда шаруулжа байнабди, - гэжэ айлшад интернет соо бэшээ. 

Энэ мүрысөөндэ Бадма Хаминдаев аяар гурбан медаль абажа шадаа. Тэрэ хубиин тоосоондо аргагүй мэргэнээр харбажа, бусад тамиршадта багаханшье найдал үлээгөөгүй. Командна микст тоосоондо Татьяна Андриевскаятай хамта Бадма харбажа, түрүү һуури эзэлһэн байна. Баир Шигаев, Баярто Базаров болон Бадма Хаминдаев гэгшэд командна тоосоондо шангай хоёрдохи һуури эзэлээ.

- Манай Буряад орондо иимэ томо мүрысөөнэй болоһондонь баяртай байнабди. Минии амжалтада энэ ушар ехээр нүлөөлөө гэжэ һанагдана. Тиимэһээ һорилго хэжэ байһандаал адляар харбаад, түрүүлжэ гарааб, - гэжэ Бадма Хаминдаев хөөрэнэ. 

Классическа түхэлэй номо һуршаар харбалгада Сергей Хутаков хоёр дахин түрүү һуури эзэлээ. Тэрэ хубиин болон командна микст тоосоондо шалгараа гээд хэлэлтэй. Ирина Баторова алтан болон хүрэл медальнуудта хүртөө. 

Yе мүсэ муутай тамиршадай дунда Марина Бадмаева, Александр Дорофеев гэгшэд мүнгэн медаль абаа. Хараа муутай тамиршад анха түрүүшынхиеэ Ородой чемпионадай медальнуудта хүртэхын түлөө мүрысөөндэ хабаадаба. Түрүү хоёр һуури Баярто Будаев болон Чингис Сыдеев гэгшэд эзэлээ. 

- Оройдоол жэл тухай һур харбалгаар бэеэ һориноб. Цыденбал Тогошиевич Цыренжапов, эрэмдэг бэетэй хүн, олон жэлэй туршада hоригшоор хүдэлнэ. Маанадые иигэжэ бэлдэhэндэнь, баяр хүргэнэбди, - гэжэ Чингис Сыдеев хөөрэнэ.

– Хараа муутай хүнүүдэй дундаhаа гансаараа харбадаг байгааб. Гурба һарын урда тээ Баярта Будаев гэжэ залуу хүбүүнтэй танилсаад, һур харбалгада ерыш гэжэ дуудааб. Мүнөө Баярта ахатанаа шүүжэ гарабал даа. 

Ородой суглуулагдамал командын ахамад һоригшо Виктор Сапуновой хэлэһээр, түрүү болон шангай һууринуудые эзэлһэн тамиршад һорилгодо уригдаха юм. 

- Сентябрь соо Пекин хотодо дэлхэйн чемпионат болохо юм. Манайшье команда тэндэ хабаадахаар түсэблэнэ. Тиимэһээ һорилгын үшөө гурбан шатанууд эмхидхэгдэхэ. Мүн тиихэдэ Чехи гүрэндэ үнгэрэгдэхэ уласхоорондын мүрысөөндэ хабаадахабди, - гэжэ Виктор Сапунов хөөрэнэ. 

Залуушуул шандааһаяа харуулна 

Буряад орондо һур харбалгаар hайн заншалнуудые халан абаха бэрхэ тамиршадай ургажа ябаһые Орёл хотодо залуу һүрэг харуулжа шадаа. Манайхин зургаан алтан, хоёр мүнгэн медальнуудые абажа шадаа. 

Мүнөө жэлэй мүрысөөндэ 31 можо нютагай 347 тамиршан суглараа. Командна микст тоосоондо Базаржап Цыбенов, Юлия Цыбенова, Эрдэм Ирдынеев болон Светлана Гомбоева гэгшэд түрүү һуури эзэлээ. Эдээнэй дундаhаа Светлана Гомбоева хубиин тоосоондо баһа чемпионой нэрэ зэргэдэ хүртөө. Эрдэм Ирдынеев финальна шатада нютагайнгаа тамиршан Эрдэм Цыдыповтэ шүүгдээ. 

Блочно номо һуршаар харбалгада Сергей Шенхоров чемпион боложо тодороо. Шангай хоёрдохи һуури Виктория Харитонова эзэлһэн байна. Тэрэ Түнхэнэй аймагта Сэсэг Доржиевагай ударидалга доро һорилго хэнэ. Бэрхэ һоригшын үшөө нэгэ шаби Туяна Забанова тус мүрысөөндэ “Ородой спортын мастер” гэһэн нэрэ зэргэдэ хүртөө. Мүнөө үедэ Москвада ажаһуудаг Найдан Сушкеев өөрынгөө наһанай бүлэгтэ түрүү һуури эзэлээ. 

Виктория Харитонова, Туяна Забанова

Сергей Хутаков