1028
Байгша оной сентябриин 22-30-най үдэрнүүдтэ Германиин Гамбург хотодо үнгэргэгдэхэ дэлхэйн чемпионадта Тамир Галанов хабаадаха болобо.
“Боксоор Европын конфедерациһаа дэлхэйн чемпионадай 52 кг хүрэтэр шэгнүүртэТамир Галанов хабаадаха гэһэн бэшэг абаабди”, - гэжэ Ородой Холбоото Уласай Боксын федерациин секретарь Умар Кремлев хэлэбэ.
Европын чемпионадай дүнгүүдээр Ородой Холбоото Уласай Василий Егоров (49 кг хүрэтэр шэгнүүртэ), Габил Мамедов (60 кг хүрэтэр), Сергей Собылинский (69 кг хүрэтэр), Пётр Хамуков (75 кг хүрэтэр), Муслим Гаджомагомедов (81 кг хүрэтэр), Евгений Тищенко (91 кг хүрэтэр), Максим Бабанин (91 кг-һаа дээшэ шэгнүүртэ) гэгшэд Тамир Галановтай хамта дэлхэйн чемпионадта хабаадаха юм.
2016 оной һүүл багта боксёр Бэлик Галанов нэрэеэ һэлгэжэ, Тамир болоһон байна гэжэ һануулнабди.
Тамир Галанов Европын чемпионадта хабаадажа, мүнгэн медальда хүртэһэн юм. Тиихэдэ залуу тамиршан Ородой Холбоото Уласай чемпионадта 3-дахи илалта туйлаһан, мүнгэн медальда 5-дахи хүртэһэн, уласхоорондын спортын мастер юм.
