1098
Дэлхэйн тамиршад Буряад Уласта үнгэргэгдэхэ Борис Будаевай шанда хүртэхэ турнирта турнирта хабаадаха.
СССР-эй спортын габьяата мастер, дэлхэйн, Европын, Азиин чемпион Борис Будаевай шанда эдир тамиршадай дунда сүлөөтэ барилдаагаар XXV-дахи турнир Улаан-Үдэдэ июлиин 27-до тамирай-соёлой байшанда эмхидхэгдэхэ юм. Энэ турнир Борис Будаевай 60 наһанай ойн баярта зорюулагдана.
Монгол, Солонгос, Хитад, Казахстан болон Ородой Холбоото Уласай 148 тамиршад мүрысөөндэ хаба шадалаа туршаха гэжэ хараалагдана. Тиихэдэ уласхоорондын зэргэтэй 18 шүүгшэд, тэдэнэй тоодо Буряад Уласай дүрбэн шүүгшэд энэ турнирта хабаадаха. Июлиин 27-до үглөөнэй 9 сагта эдир тамиршад мүрысэжэ эхилхэ, хэмжээ ябуулгын нээлгын баяр ёһолол үдэрэй 13 сагта үнгэргэгдэхэ.
“Энэ турнир һайн дэмжэлгэтэй. Ородой Холбоото Улас дотор үнгэргэгдэдэг эдиршүүлэй турнирнуудта, Яхад, Чечня, Дагестан уласуудһаа гадуур, иимэ шангай жаса үгы юм”, - гэжэ Ородой Холбоото Уласай габьяата һоригшо Борис Будаев тэмдэглэбэ.
Энэ турнирта түрүүшын һуури эзэлһэн хүн 50 мянган түхэригэй шанда хүртэхэ. Хоёрдохи һуурида – 35 мянган, гурбадахи һуурида – 20 мянган түхэригэй шан барюулагдаха. Тиихэдэ тамирай-соёлдой байшанда суута барилдаашанай гэрэл зурагуудай үзэсхэлэн дэлгэгдэхэ, сэнхир экранда Борис Будаевай барилдажа байһан үеын буулгабаринууд харуулагдаха.
Ородой Холбоото Уласай габьяата һоригшод Арсен Фадзаев болон Омар Муртузалиев, дэлхэйн болон Азиин чемпион Пак Джан Сун, Солонгосой Бүхэ барилдаанай нэгэдэмэл дэлхэй гэһэн эмхиин гэшүүн Ким Ик Джон болон бусад айлшад ерэхэ юм.
“Буряадай омогорхол” гэһэн түсэлдэ Борис Будаевые зууршалһан дурадхал оронхой гэжэ һануулнабди.
