1580
Байгша оной июлиин 20-24-нэй үдэрнүүдтэ Ирландиин Уэксфорд хотодо гиир үргэлгөөр эдиршүүлэй дунда Европын чемпионат эмхидхэгдэбэ.
Ородой Холбоото Уласай суглуулагдамал командын бүридэлдэ Буряад Уласай Хяагта аймагай Хяагтын 4-дэхи юрэнхы болбосоролой дунда һургуулиин 9-дэхи классай һурагша Роман Якушев хабаадаба. 58 кг хүрэтэр шэгнүүртэ Хяагтын Хүүгэдэй, эдиршүүлэй тамирай һургуулиин хүмүүжэмэл алтан медальда хүртэбэ.
Байгша оной февраль һарада эдиршүүлэй дунда гиир үргэлгөөр Ородой Холбоото Уласай мүрысөөндэ мүнгэн медальда тэрэ хүртэһэн байна.
Эдир тамиршан Роман Якушевые Владимир Алексеев һоридог юм. Владимир Иванович аймаг дотороо гиир үргэлгэ хүгжөөжэ, эдир тамиршад үндэр амжалтануудые туйладаг юм. Тиихэдэ жэл бүри багшын ажалай ветеранууд Прокопий Аносов болон Геннадий Кравцов гэгшэдэй дурасхаалда зорюулжа, уласай турнир үнгэргэдэг.
