1441
2017 оной июлиин 5-6-най үдэрнүүдтэ Кабанск аймагай Энхалук һууринда гиир үргэлгөөр дэлхэйн кубогто хүртэхэ мүрысөөнүүдэй 4-дэхи шата үнгэргэгдэхэ.
Ородой Холбоото Уласай 20 можо нютагуудай, Монгол, Хитад, Казахстан, Узбекистан, Кыргызстан гүрэнүүдэй 160 тухай тамиршад энэ хэмжээ ябуулгада хабаадаха. Тиихэдэ Франци, Голланди, Ирландиин гиир үргэгшэд ерэхээр хараалагдана. Бороогүй уларилай байгаа һаань, Байгал далайн эрьедэ тамиршад хаба шадалаа туршалсаха. Энэ мүрысөөндэ илажа, нормативуудые дүүргэгшэд “уласхоорондын классай спортын мастер” гэһэн нэрэ зэргэдэ хүртэхэ юм.
- Жэл бүри гиир үргэлгөөр дэлхэйн кубогой шата Санкт-Петербург, Лас-Вегас хотонуудта болон Энхалук һууринда үнгэргэгдэдэг юм. Саашадаа 2020 он болотор Азиин-Номгон далайн можодо Буряад Улас гиир үргэлгэ хүгжөөлгын түб болгохо һанаатайбди. Ородой Холбоото Уласай гиир үргэлгын федераци, Буряад Уласай Засагай газар, Арадай Хурал манай уласта гиир үргэлгэ дэмжэдэг, - гэжэ Ородой Холбоото Уласай гиир үргэлгөөр спортын габьяата мастер, Буряад Уласай Арадай Хуралай һунгамал Сергей Леонов хэлэбэ.
Дэлхэйн кубогто хүртэхын түлөө гиир үргэлгөөр 4-дэхи шатын мүрысөөнэй нээлгын баяр ёһолол августын 5-да үдэрэй 15 сагта эхилхэ юм.
Гиир үргэлгөөр уласхоорондын мүрысөөндэ мэдээжэ боксёр, Ородой Холбоото Уласай Гүрэнэй Дүүмын һунгамал Николай Валуев айлшаар ерэхэ. Тэрэнтэй хамта гиир үргэлгөөр Бүхэроссиин Федерациин Юрэнхылэгшэ Игорь Петрович Солодов, вице-президент Алексей Борисович Ажермачев, уласхоорондын классай шүүгшэ, Ородой Холбоото Уласай суглуулагдамал командануудай бэлэдхэл гарадаг түбэй паралимпиин, сурдолимпиин болон олимпиин наадануудта ородоггүй тамирай наадануудай таһагай дарга Анатолий Николаевич Левченко гэгшэд энэ хэмжээ ябуулгада хабаадалсаха.
