913
Буряадай тамиршан Германиин Гамбург хотодо үнгэргэгдэhэн дэлхэйн тэмсээндэ шалгарба. 52 килограмм хүрэтэр шэгнүүртэ ялас гэмэ амжалта туйлажа, хүрэл медальда хүртөөд, Буряад ороной спортын түүхэдэ нэрэеэ алтан үзэгүүдээр бэшүүлбэ гээшэ.
2016 оной һүүл багаар Хэжэнгэһээ уг гарбалтай боксёрой нэрэеэ һэлгэхэдэнь, бүхы хүн зон ехэтэ гайхаа бэлэй. “Шүүжэ шадахаа болиходонь, нэрэнь һаалта хэбэ”, “ Нэрэеэ һэлгэхэдээ, урагшатай байха юм гү?” гэхэ мэтэ үгэ хүүр хүн зоной дунда гараа һэн.
- Өөрынгөө дураар нэрэеэ һэлгээгүйб. Дасанда ошоходомни, Бэлиг гэһэн нэрэ шамда хүндэ байна, тиимэһээ нэрэеэ һэлгэхэдэшни, саашанхи харгышни урагшатай байха гэжэ лама хэлээ бэлэй, - гэжэ тамиршан нэгэтэ бэшэ спортдо дуратайшуулда ойлгуулһан байна.
2017 оной эхиндэ тэрэ 52 килограмм хүрэтэр шэгнүүртэ шаасалдахаар бэлэн байһанаа мэдүүлбэ. Тамир Галанов урда жэлнүүдтэ 49 килограмм шэгнүүртэ Ородой чемпионадта юһэн жэлэй туршада медаль абажа шадаһан намтартай. Энэ хугасаа соо тэрэ гурба дахин Ородой чемпионой нэрэ зэргэдэ хүртөө, нэгэ дахин Европын чемпионадта шангай хоёрдохи һуури эзэлһэн байна.
Шэнэ шэгнүүртэ Тамирай түрүүшын алхамууд тиимэшье урагшатай байгаагүй. Буряад ороной хүбүүн Европын чемпионадта бирагүйдэжэ, дэлхэйн чемпионадта хабаадаха эрхэгүй үлэшөө бэлэй. Удаань Тамир Галанов түрэл нютагаа ерэжэ, “Байгал” гэһэн бүхэроссиин мүрысөөндэ хүндэтэ айлшан болоо hэн. Нютагайнгаа сэбэр агаараар амилжа, бурхадтаа, сахюусадтаа мүргэжэ бусаа һэн. Эгээл энэ үедэ Тамирта дэлхэйн чемпионадта хабаадаха тусхай урилга Европын боксын конфедераци барюулһан байна. Ородой боксын федераци болон суглуулагдамал командын һоригшод манай боксёр хүбүүндэ найдажа, дэлхэйн чемпионадта хабаадаха эрхэ олгоо гээд ойлгохо хэрэгтэй. Тамир энэ найдалыень гүйсэд дүүрэн харюулжа шадаба гээшэ.
Ородой тамиршад тус мүрысөөндэ оройдоол хоёр медаль абаһан байна. Олимпиин чемпион Евгений Тищенко хоёрдохи һуури, Тамир Галанов гурбадахи һуури эзэлбэ. Гамбургда Тамир дүрбэ дахин ринг дээрэ гараа. Барбадос гүрэнэй Джабали Бриди гэгшые түрүүшын уулзалгада шүүгээ. Тамиршанай һоригшо Бато Батуевай хэлэһээр, энэ уулзалгада Тамир зарим сагтань муушагаар хүдэлһэн байна. Тиигэбэшье түрүүшын тулалдаанай дүн гаргалгада энэнь ехэ нүлөөлөөгүй.
Коста-Рикын боксёр Давид Хименес манай нютагай хүбүүнтэй ана-мана тулалдажа, 2:3 тоотойгоор шүүгдээ. Энэ уулзалгын һүүлдэ Бато Батуев сухалтай байба. “Мүнөөдэр Тамир яһала олон алдуу гаргаа. Тэдээн дээрээ хүдэлхэ сагынь бага үлэбэ. Шаасалдаанай һүүлшын секунда хүрэтэр эсээгүй байһанииень һайшаалтай”, - гэжэ һоригшо тэмдэглээ.
Удаадахи уулзалгадаа 2012 оной Олимпиадада хабаадагша, Италиин боксёр Мануэль Каппаи гэгшые Тамир диилээ. 5:0 гэһэн тоотойгоор шүүхэдэньшье, эрилтэ ехэтэй һоригшо Бато Батуев алдуунууд байгаа гэжэ хэлэһэн байна.
Хахад финалай уулзалгада Тамир Галанов Куба гүрэнэй түлөөлэгшэ Йосван Вейтитэй уулзаба. Шүүгшэдэй һанамжаар, сентябриин 1-дэ болоһон энэ уулзалгада 3:2 гэһэн тоотойгоор кубинец шүүһэн байна.
- Мүнөөдэр яһала һайнаар шаасалдааб гэжэ һананаб. Энэ уулзалгынгаа видео хараха хэрэгтэй. Тэрэнэй удаа өөртөө сэгнэлтэ үгэхэб, - гэжэ Тамир Галанов уулзалгын һүүлдэ сурбалжалагшадта хэлэһэн байна.
- Тамир мүнөөдэр ехэ һайнаар шаасалдаһан байна. Харин Кубын боксёр мүнөөдэр өөрынгөө бүхы шадабари харуулжа шадаагүй. Тиигэбэшье Кубын тамиршан илаба гэжэ шүүгшэд дүн гаргаа, - гэжэ Бато Батуев тэмдэглээ.
Ородой боксын федерациин генеральна секретарь Умар Кремлевой хэлэһээр, шүүгшэд буруу дүн гаргажа, Тамир финалда орожо шадабагүй.
- Энэ уулзалга Тамир муушагаар эхилбэшье, хоёрдохи, гурбадахи шатануудтаа һайнаар шаасалдажа, шүүгээ гэжэ һананаб, - гээд Умар Кремлев мэдүүлһэн байна.
Дэлхэйн чемпионадта Кубын тамиршад эгээл дээгүүр дүн харуулаа. Тэндэхи боксёрнууд табан алтан, хоёр мүнгэн медальнуудта хүртөө. Казахстан, Франци, Узбекистан, Украина, Азербайджан гүрэнүүдэй тамиршад нэгэ-нэгэ алтан медальнуудые абаа. Монголой боксёр Отгондалай Доржямбуу 60 килограмм хүрэтэр шэгнүүртэ гурбадахи һуури эзэлээ.
Автор: Борис БАЛДАНОВ
