​Дүрбэдэхиеэ дэлхэйн чемпион болобо

Сентябриин 15-22-ой үдэрнүүдтэ Хойто Солонгосой ниислэл болохо Пхеньян хотодо тхэквондогоор дэлхэйн чемпионат 20-дохиёо үнгэргэгдэбэ. Тус мүрысөөндэ Буряадай тамиршан Евгений Оцимик ялас гэмэ амжалта туйлажа, дэлхэйн чемпионой нэрэ зэргэдэ хүртөө. Эндэ Александр Бодров гурбадахи һуури эзэлээ. 

Ородой Холбооной тхэквондистнууд бүхэдэлхэйн хэмжээнэй мүрысөөнүүдтэ түрүү һууринуудые эзэлдэг һайн заншалтай. Тиимэһээ манай командын бүридэлдэ бултанhаа олон тамиршад байгаа. Бүхыдөө 69 гүрэнэй тамиршад Хойто Солонгос ерээ. 

- Бидэ айжа байгаад тиишээ ошообди. Юуб гэхэдэ, дэлхэй дээрэ шахардуу байдал тогтоод байна ха юм. Америкын Холбоото Штадуудай, Японой, Урда Солонгосой болон бусад 10 гаран гүрэнэй тхэквондистнуудай чемпионадта ерээгүйнь ойлгосотой, - гэжэ Буряад Ула- сай ахамад һоригшо Эрдэни Жамбалов хөөрэнэ. – 2011 ондо Хойто Солонгосто дэлхэйн чемпионат болоһон байна. Тиихэдэ бултанаймнай гар утаһануудые, видеотехникэ хилэ дээрэ хуряажа абаhан байгаа. Харин мүнөө байдал ондоо болоо. Хүнүүд түрэл гаралнуудтаяа гар утаһаараа хөөрэлдэжэ, амжалтануудаараа хубаалдажа байгаа. Үйлсэдэнь автомашинанууд олон болоһон байна. Манай командатай хэдэн хүн дахасалдажа ябаа. Юу хэхэеэ тэдээнһээ асууха хэрэгтэй байгаа. Хэдэн дахин намайе тэдэ бэдэрээ: солонгос яһатантай нюур шарайгаараа адлишуу хадамни олон соо илгаруулхаа болишоно. Гоё, һэльбэн шэнэлэгдэhэн зохид буудалда байрлаабди. Тамиршадые эдеэ хоолоор хангалга hайн хэмжээндэ байгаа.

Эрдэни Жамбаловай хэлэһээр, тхэквондо Хойто Солонгосһоо эхитэй. Тиимэһээ 20-дохи мүрысөө эмхидхэхые “манда даалгыт даа” гэжэ гуйһан байна. Ородой суглуулагдамал командын бүридэлдэ Буряадай оройдоол хоёр тамиршан ороhон байна: Евгений Оцимик, Александр Бодров гэгшэд. 

Европын болон дэлхэйн чемпионадуудта хэдэн дахин амжалта туйлабашье, Александр Бодров иимэ хэмжээнэй мүрысөөндэ анха түрүүшынхиеэ хабаадаhан байна. Тэрэ ехэшүүлэй дунда дэлхэйн чемпионадта хабаадажа үзөөгүй ябаа. Тиимэһээ тэрэнэй гурбадахи һуури эзэлhэниинь тон ехэ амжалта гээд һанагдана. 

- Индиин тамиршантай түрүүшын уулзалгада доянг дээрэ гараад, ехэ айһан шэнги болооб, хүл гарни һалганаад абаа. “Юундэ эндэ ерээбиб”, “шүүгдэбэл, эгээл муу хүн болохоб” гэжэ байгаад бодомжолооб, бэеэ һамааруулааб. Тус уулзалгые шүүхэдээ, нэгэ бага бараг болооб. Удаадахи уулзалгануудта Монголой болон Хитадай тамиршадые илажа гарааб. Хахад финалай уулзалгада Хойто Солонгосой тхэквондисттай ана-мана тулалдааб. Тэрэ намайе нэмэлтэ сагай үедэл шүүжэ гараа. Тиигэжэ “туль” гэһэн шэглэлээр гурбадахи һуури эзэлээб, - гэжэ Александр Бодров хөөрэнэ. 

Евгений Оцимик Хойто Солонгосто 2011 ондо илалта туйлаһан байна. Тэрэ түрүүшын амжалтань hэн. Удаань Евгений үшөө хоёр дахин дэлхэйн чемпион болоһон юм. 

- Урда жэлнүүдтэ иимэ мүрысөөндэ ошоходоо, “би чемпионби!” гэжэ бодожо ябадаг hэмби. Мүнөө жэлдэ тиимэ бодол толгой соомни ороогүй. Ушарынь гэхэдэ, энэ хабартаа Европын чемпионадай финалда шүүгдэшөө һэм. Тиимэһээ ямаршье сагта шүүгдэжэ болохоб гэжэ мэдэрээб, - гэжэ Евгений Оцимик хөөрэнэ. 

Ахамад һоригшо Эрдэни Жамбаловай хэлэһээр, Жениһээ бэшэ Ород гүрэндэ гурба дахин дэлхэйн чемпион үгы hэн. Тиимэһээ бүхы һоригшод тэрээндэ “ши дүрбэдэхиеэ чемпион болобол, түүхэдэ орохош” гэжэ ходо хэлэжэ байгаа. 

- Европын гүрэнүүдтэ оройдоол 4-5 хүн дэлхэйн гурба дахин чемпионой нэрэ зэргэтэй юм. Тиимэһээ ямаршье мүрысөөндэ ошоходомнай, Жениин гар барижа, гэрэл зурагыень буулгажа абаха дуратайшуул олошоржол байна, - гэжэ Эрдэни Жамбалов хэлэнэ. 

Дүрбэдэхиеэ чемпион болохын түлөө Евгений Оцимик Монголой, Угандын болон Хойто Солонгосой хоёр тамиршадые шүүжэ гараа. 

- Энэ амжалта туйлахын түлөө 24 жэлэй туршада бэеэ һориноб. Энэ хугасаа соо нэгэшье дахин һорилгодоо ошонгүй байжа гү, али гээгдэжэ үзөөгүйб, - гэжэ Евгений Оцимик хөөрэнэ. 

Тус мүрысөөндэ Мон- голой тамиршад тон һайн дүнгүүдые харуулһан байна. Тэдэ табан алтан, дүрбэн мүнгэн медальнуудтай нютагаа бусаа.