​Енисей мүрэнэй эрье дээрэ

Алёна Сангадиева, Александр Гармаев, Наиля Абзалова 

Эдэ үдэрнүүдтэ бүхы дэлхэйн барилдаанда дура­тайшуулай болон мэргэжэлтэдэй анхарал манай Сибирь руу хандуулагданхай. Юуб гэхэдэ, январин 26-28-ай үдэрнүүдтэ сүлөөтэ болон эхэнэрнүүдэй барилдаагаар уласхоорондын “Голден Гран-при “Иван Ярыгин” гэһэн мүрысөөн болохонь. Харин үнгэрһэн амаралтын үдэрнүүдтэ тус хэмжээ ябуулгада шэлэн абалгын шата үнгэргэгдэжэ, 400 гаран барилдааша­дые хибэс дээрэ суглуулаа.

Дэлхэйн суута һоригшо Дмитрий Миндиашвилиин барилдаанай академиин шангуудта хүртэхын түлөө бүхэроссиин мүрысөөн 16-дахияа боложо бай­на гээд тэмдэглэмээр. Мүнөө жэл болотор энэ мүрысөөндэ иимэ шан­га гэгшын тулалдаанууд болоогүй байгаа бшуу. Эндэ үндэр нэрэ зэргэтэй ба­рилдаашадай хабаадаһан ушарһаа тус хэмжээ ябуул­га олон тоото уласхоорон­дын мүрысөөнүүдһөө холо үлүү байгаа гээд ехэнхи мэргэжэлтэд тэмдэглэнэ.

Энэ шанга тулалдаану­удта Буряадаймнай түрүү барилдаашад сооһоо ганса Балдан Цыжипов һайн ба­рилдаа харуулжа, Ярыги­най мүрысөөндэ хабаадаха эрхэдэ хүртөө.

Балдан Цыжипов

Мүнөө жэл эгээл хүндэ шэгнүүртэ аяар 26 барил­даашад сугларшоо. Балдан Красноярскын хибэс дээрэ дүрбэн уулзалга үнгэргөө. Түгэсхэлэй шатада тэрэ Дагестанай Мурадин Куш­ковто шүүгдэжэ, хоёрдохи һуури эзэлээ. Тиигэбэшье тэрэ бүгэдэндэ мэдээжэ мүрысөөндэ хабаадаха эр­хэтэй болоо. Тус 125 кило­грамм хүрэтэр шэгнүүртэ Эрхүү можын буряад барилдаашан Григорий Жербаев шангай гурбадахи һуури эзэлээ. Энэ хадаа залуу хүбүүнэй эгээл ехэ амжал­тань гэжэ мэдүүлэе.

61 килограмм хүрэтэр шэгнүүртэ Эрхүү можын Юлиан Гергенов түрүүлжэ, чемпионой нэрэ зэргэдэ хүртөө. Тэрэ баһа Ярыги­най мүрысөөндэ хабаа­даха эрхэдэ хүртөө. Ерэ­хэ мүрысөөндэ Буряадай түрүү барилдаашан Алек­сандр Богомоевтой алишье шатада Юлиан уулзажа магадгүй.

92 килограмм хүрэтэр шэгнүүртэ Тимур Баторов гурбадахи шангай һуури эзэлээ. Олимпиин наада­нуудта мүнгэн медальда хүртэһэн Инна Степанова­гай наһанай хани нүхэр Ти­мур үнинэй иимэ һайн дүн харуулаагүй байгаа.

Тус мүрысөөндэ эхэнэрнүүдэй дунда баһа шанга гэгшын тулалдаанууд бо­лоо. Буряадай түлөөлэгшэд эндэ нэгэ алтан, хоёр мүнгэн ба гурбан хүрэл ме­дальнуудые абаба.

Самбо барилдаагаар дэл­хэйн чемпион Анна Щерба­кова 65 килограмм хүрэтэр шэгнүүртэ түрүүлжэ гараһан байна. Хоёрдохи шан­гай һууринуудые Наталья Парникова болон Наиля Аб­залова эзэлээ. Алёна Санга­диева, Саяна Цыбикова, Эр­жима Жамсаранова гэгшэд гурбадахи һуурида гараа.

“Голден Гран-при “Иван Ярыгин” гэһэн уласхоорон­дын мүрысөөндэ хэды эхэ­нэр хабаадахаб гэжэ үшөө мэдэгдэнэгүй. Ородой су­глуулагдамал командын һоригшодой уридшалан мэдээсэһэнэй ёһоор, Буряадай барилдаашад сооһоо Ирина Ологонова, Нина Менкено­ва, Стальвира Оршуш, Улья­на Тукуренова гэгшэд заал һаа Красноярскын хибэс дэ­эрэ гараха. Миндиашвили­ин барилдаанай академиин шангуудта хүртэхын түлөө мүрысөөндэ шалгарһан бу­сад буряад басагаднай Яры­гинай тулалдаануудта хаба­адаха бэзэ гээд найдагдана.