​Стальвира Оршуш алтан медальда хүртэбэ

Эхэнэрнүүдэй дунда уласхоорондын мүрысөөн Швецидэ үнгэржэ, Буряадай тамиршад гурбан ме­даль тэндэ абажа шадаа. Стальвира Оршуш эндэ түрүүлжэ гараа.

Бүхэдэлхэйн барилда­анай нэгэдэлэй үүсхэлээр 2018 оной эхинһээ шэнэ гу­римууд тогтоогдонхой. Нэгэ­ниинь гэхэдэ, эхэнэрнүүдэй дунда рейтинговэ дүрбэн томо мүрысөө эмхидхэхэ тухай шиидхэбэри болоно. Түрүүшын мүрысөөниинь Швецидэ үнгэрдэг “Klippan Lady Open” гээд тоологдодог болонхой.

Стальвира Оршуш анха түрүүшынхиеэ 55 кило­грамм хүрэтэр шэгнүүртэ барилдаанай хибэс дээрэ гараа. Швециин, Венгриин тамиршадые илаад, Япон гүрэнэй түлөөлэгшэ Сена Нагамото гэгшые 10:4 гэһэн тоотойгоор шүүжэ гараа. Финалда манай басаган Тур­циин Бедина Гун гэгшые илажа, мүрысөөндэ түрүү һуури эзэлһэн байна.

Мүнөө жэлэй эхиндэ Стальвира Красноярск хо­тодо үнгэрһэн суута Иван Ярыгинай асари томо улас­хоорондын мүрысөөндэ хо­ёрдохи һуури эзэлээ һэн гээд һануулая.

Тус мүрысөөндэ үшөө хоёр Буряадаймнай барил­дааша басагад шалгараа. Шагналгын баяр ёһололой үедэ Стальвира Оршушой хажууда Нина Менкенова зогсоо. Тэрэ Турциин Бедина Гунда шүүгдэбэшье, хүрэл медаль абахын түлөө тулал­даанда шалгараа юм.

Буряадай басагадай түрүү барилдаашан болохо Ири­на Ологонова 57 килограмм хүрэтэр шэгнүүртэ барилда­жа, операци хүүлһэнэй удаа һайн боложо ябаһанаа харуу­лаа. Энэ ушарта Иринын гур­бадахи һуури эзэлһэниинь сэнтэй.

Манай нютагай Ульяна Ту­куренова болон Валерия Су­ворова шангай һууринуудта гараашьегүй һаа, һайн ба­рилдаа харуулһыень тэмдэ­глэе.

Энэ мүрысөөндэ Монго­лой барилдааша басагадай хабаадаагүйнь харамтай. Дэлхэй дээрэ түрүүлжэ яба­даг Японой басагад гурбан алтан, гурбан мүнгэн ме­дальнуудта хүртөө. США-гай тамиршад хоёр алтан ме­даль абаа. Канадын, Норве­гиин, Финляндиин болон Швециин тамиршад өөр өөрын шэгнүүртэ түрүүлжэ гараһан байна. Тиимэһээ бу­ряад басагадай түрүүшүүлэй дунда шалгарһаниинь баяр­тай гэхээр.