​Нохой жэлтэн мүрысөө

Сагаан һарын һайндэрнүүдтэ Улаан-Үдэ хотын 57 дугаар һургуулиин дэргэдэ ехэ удха шанартай ша­тарай мүрысөөн үнгэргэгдэбэ. 12 дугаар Банди­да Хамба лама Даша-Доржо Этигэловэй шангууд­та хүртэхын түлөө хэмжээ ябуулгада Улаан-Үдэ хотын, Хори, Ярууна, Хурамхаан аймагуудай 50 гаран хүн хаба шадалаа туршалсаба.

Энэ мүрысөөндэ ганса но­хой жэлтэй хүбүүд, басагад хабаадаһан байна. 2006 оной январиин 30-һаа 2007 оной февралиин 17 болотор хуга­саада түрэһэн үхибүүд шан­га гэгшын тулалдаануудта оролсоо.

57 дугаар һургуулиин дэр­гэдэхи “Энергия” гэһэн шата­рай клубай хүтэлбэрилэгшэ Николай Кованов тус мүрысөө эмхидхэжэ, ахамад шүүгшээр хүдэлөө.

- Манай һургуулида “Энер­гия” гэһэн клуб хэдэн жэл соо хүдэлжэ байдаг. Мүнөө сагта 80 гаран үхибүүд ша­тар наада шудалжа, сагаа үнгэргэнэ. Һоригшо Николай Александрович хирэ-хирэ бо­лоод лэ, үхибүүдэйнгээ дунда мүрысөө үнгэргэжэ байдаг, - гэжэ һургуулиин захирал Га­лина Николаевна Жербанова хөөрэнэ.

Мүрысөөнэй үедэ үхибүүд миинтээр эдеэлжэ, һаруул гоё танхимууд соо наадаһан бай­на. Үшөө тиихэдэ эдиршүүл мүрысөөндэ хабаадаһанай түлөө нэгэшье түхэриг түлөөгүй юм.

Басагадай дунда түрүү һуурида Екатерина Баирова гараа. Дарья Бужинаева бо­лон Юлия Кузьмичева хоёр шангай һууринуудые эзэлээ. Оройдоол һүүлшын шатада Юлия 3-дахи һуурида гаража шадаа гэжэ хэлэхэ хэрэгтэй.

Хүбүүдэй дунда шанга тулалдаан һүүлшын наадан болотор үнгэрөө. Тон адли 6 очко абаһан Михаил Монхо­ров болон Эрдэм Хубукша­нов гэгшэдэй дунда нэмэлтэ коэффициент тоологдоо. Эндэ Михаил Монхоров чем­пион боложо тодороо. Гурба­дахи һуурида 5,5 очко абаһан Хурамхаан аймагай Зорикто Цыденов гараа.

Мүрысөөндэ хабаадаһан бүхы тамиршад мүнгэн шан­да хүртөө гээд хэлэлтэй.

2019 ондо хюлгын саана гахай жэлтэн һуужа, үшөө һайхан наада харуулха бэзэ гээд һанагдана.

Авторай гэрэл зурагууд