​Олимпиин наадануудай дүн

Февралиин 25-да Урда Со­лонгосой Пхёнчхан хотодо үбэлэй Олимпиин ээлжээтэ нааданууд түгэсэбэ. Ородой суглуу­лагдамал коман­да 17 медаль аба­жа шадаа.

Нэн түрүүн Буряадай урдаа хараха тамиршан Алиса Жамбалова тухай хэдэн үгэ. Олимпиин на­адануудта манай санаша басаган дүрбэ дахин урилдаануудта хабаа­даа.

Спринт урилдаанда Алиса эгээл муу дүн харуулаа гэхээр. Тэрэ 44-дэхи һуури эзэлжэ, финальна шатада гаража шадаагүй.

Удаадахи урил­даануудта Алиса Жамбалова бүри һайнаар гүйһэн байна. 10 модо зайда Буряадай тамиршан 17-дохи һуурида га­раа. Мүн 30 модо зайда 15-дахи һуури эзэлһэн байна. Иимэ һайн дүнгүүдые Дэл­хэйн Кубогта хүртэхын түлөө мүрысөөнүүдтэ Алиса харуулаагүй байгаа бшуу.

Эдэ Олимпиин наадануудта Оро­дой санашад хэ­зээ хэзээнэйхиһээ урагшатайгаар хабаадаба. Бүхы дээрээ тэдэ аяар 8 медальтай гэртээ бусаа.

Пхёнчханда Ородой тамир­шад хоёр алтан медаль абаһан байна. Коньки дээрэ фигурна һолжоролгоор Алина Загитова үшөө нэгэ Ородой тамирша Евгения Медведеваһаа нэгэ бага үлүү бай­жа, Олимпиин наадануудай чемпионой нэрэ зэргэдэ хүртөө.

Хоёрдохи алтан медаль хоккейгээр суглуулаг­дамал команда абаһан байна. Олон тоото зоной дура буляаһан энэ спортын зүйлөөр Ородой тамиршад аяар 26 жэл соо Олимпиин наадануудта түрүү һуури эзэлээгүй байгаа. Финальна уулзалгада манай хоккей наадагшад нэмэлтэ сагта Германиин командые 4:3 гэһэн тоотой­гоор илаа.

Олимпиин наадануудта эгээл олон медальнуудые Норвегиин тамиршад абаһан байна. 39 медаль сооһоонь 14-иинь алтан болоно. Германиин тамиршад баһа 14 алтан медаль аба­башье, хоёрдохи һуурида гараа. Юуб гэхэдэ, бүхы дээрээ тэдэ 31 ме­дальда хүртэһэн байна. 11 алтан медальтай Кана­дын түлөөлэгшэд гурбадахи һуури эзэлээ. Эрхим 6 гүрэнэй тоодо США, Голланди ба Швеци ороо. Эндэ Ородой команда 13-дахи һуурида гараһан байна.

Олимпиин наадануудай медаль­нуудта 28 гүрэнэй түлөөлэгшэд хүртөө гээд хэ­лэлтэй. Нэгэ-нэ­гэ медальнуу­дые Казахстан, Латви, Лихтен­штейн, Бельги, Венгри, Украина гүрэнүүдэй та­миршад абаба.

ursuspolaris.wordpress.com гэһэн сайтһаа гэрэл зураг абтаба