​НЮДЭНДӨӨ ГАЛТАЙ ХҮБҮҮД - ГАЛТАЙДА

Мухар-Шэбэр аймагай Галтай һууринда һургуулиин шабинарай хоорондо барилдаагаар мүрысөөн февралиин 28-да үнгэрбэ. Энэ хэмжээн Сагаалганай найр наадануудай үргэлжэлэл болоо гээд тэмдэглэхэ шухала.

Мухар-Шэбэрэй үхибүүдэй болон эдиршүүлэй спортын һургуулиин захирал Базар Балданович Батомункуев, мүн Түгнын “Даша Чойнхорлинг” дасанай шэрээтэ Вандан лама гэгшэд энэ турнир эмхидхээ. Тиихэдэ Хошуун-Узуурта бүхэшүүлые һорилгын тамирай үргөө барюулһан мэдээжэ һоригшо Олег Бастуевич Цыдыпов энэ хэмжээндэ эдэбхитэйгээр хабаадажа, шүүгшын үүргэ даан абаһан байна.

Барилдаанай дүнгүүдээр, Галтайн һургуулиин 11-дэхи ангиин шаби Андрей Гармаев бусадые унагаажа, абарга бүхэ болоо. Тиигэжэ Вандан ламын түхөөһэн хонин бэлэгтэ хүртэбэ. Илажа гараhан бусад барилдаашадые нэрлэбэл, 25 килограмм шэгнүүртэ - Галтайн Денис Аюшеев, 30 килограмм шэгнүүртэ - Хүсөөтын Этигэл Банзаргашиев, 35 килограмм шэгнүүртэ - Галтайн Стас Спиридонов, 40 килограмм шэгнүүртэ - Нарhатын Эрдэм Гылыков, 45 килограмм шэгнүүртэ - Галтайн Жамса Нимаев, 50 килограмм шэгнүүртэ - Хошуун-Узуурай Бата Бальжинимаев, 55 килограмм шэгнүүртэ Галтайн - Чимит Нимаев, 60 килограмм шэгнүүртэ - Хүсөөтын Андрей Будажапов, 65 килограмм шэгнүүртэ - Галтайн Андрей Гармаев, 65-haa дээшэ килограмм шэгнүүртэ - Галтайн Цыбик Бальжинимаев гэгшэд шалгараа. Энэ залуу тамиршадтаа амжалта хүсэебди!

Дашима Цыдыпова