749
Буряад Уласай Толгойлогшо Алексей Цыденов болон Ородой Холбоото Уласай боксын федерациин захирал Умар Кремлев хоёр Буряад Уласта 2020 оной Олимпиадада бэлэдхэлэй бааза байгуулха арга тухай хэлсэбэ. Энэ түсэлэй бэелүүлэгдэбэл, Ород гүрэнэй суглуулагдамал команда Токио хотодо үнгэргэгдэхэ Олимпиин наадануудта манай уласта бэлэдхэл гараха юм. Уласай хүтэлбэрилэгшын хэлэһээр, Байгалай эрьедэ бааза бариха газар, мүн тиихэдэ энэ түсэлдэ мүнгэ һомологшод бии. Боксын федерациин зүбшөөл үгэбэл, барилга эхилхээр бэлэн байһанаа Алексей Цыденов хэлэбэ.
«Япон гүрэнтэй сагаараа адли байнат. Байгалай эрьедэ боксын мүнөө үеын түб байгуулжа, түхэреэн жэлдэ бэеэ һорижо,бэлэдхэл гаража байгаа гоё байха», - гэжэ Умар Кремлев хэлээд, Ородой Холбоото Уласай боксын федераци Буряад Уласые дэмжэхэ гэжэ дуулгаба.
Буряадта эхэнэрнүүдэй дунда боксоор Ородой Холбоото Уласай чемпионат үнгэргэлгэдэ дэмжэһэнэйнь түлөө Алексей Цыденов Умар Кремлевтэ баяр хүргэбэ.
«Маанадта удха шанартай хэмжээ ябуулга үнгэргэгдэбэ. Мүрысөөнэй һүүлээр, үхибүүд боксоор һонирхожо, секцинүүдтэ ябаха», - гэжэ Алексей Цыденов тэмдэглэбэ.
Харюудань боксоор дэлхэйн чемпионат үнгэргэхэ тухай мэдүүлгэ оруулхыень Умар Кремлев дурадхаба.
«Боксоор турнирта һайн бэлэдхэл хэһэн байнат. Улас дотор боксын хүгжэжэ байһанда баяраа мэдүүлнэб. Мүрысөөнэй дүнгүүдые хараад үзэхэдэ, бокс хадаа үндэһэтэнэй тамирай наадан болоно. 2021 он сүлөө, тиимэһээ эхэнэрнүүдэй дунда дэлхэйн чемпионат үнгэргэхэ тухай мэдүүлгэ уласхоорондын федерацида оруулха аргатайт», - гэжэ Умар Кремлев.
Ород гүрэнэй боксын федерациин хүтэлбэрилэгшэ Буряадай тамиршадай уласхоорондын хэмжээндэ амжалтатай хабаадаһыень тэмдэглэбэ.
«Ородой Холбоото Уласай чемпионадай түгэсхэлэй шатада дүрбэн басагад, тиихэдэ хоёр эрэшүүл командын бүридэлдэ - суглуулагдамал командын бүридэлдэ нэгэ модо нютагһаа зургаан хүн ороно. Тамир Галановые дэлхэйн чемпион гэжэ тоолодогби. Тэрэнэй хабаадаһан мүрысөөндэ байгааб, шүүгшэдэй буруу шиидхэбэри гаргаһыень хараһан байнаб», - гэжэ федерациин хүтэлбэрилэгшэ хэлэбэ.
Буряадта түрүүшынхиеэ үнгэргэгдэһэн эхэнэрнүүдэй дунда боксоор Ородой Холбоото Уласай чемпионат мартын 24-дэ түгэсэбэ.
Анна Огороднигой гэрэл зураг
