Агуу Илалтада зорюулагдаһан “Буряад үнэн” Хэблэлэй байшанай эмхидхэдэг урилдаан 72-дохиёо мүнөө жэл майн 6-да үнгэрхэнь. Заншалта энэ урилдаан аяар 1946 онһоо эхиеэ абана.
Буряадаймнай олон зоной хабаадалгатай тамирай бүхы мүрысөөнүүд сооһоо эгээл урданай түүхэтэй, баян заншалтай урилдаан болоно. Жэл бүри хабаадагшадынь олон боложол байдаг. Үнгэрһэн зуун жэлэй 70-аад онуудта 2 мянга 500 хүн хабаадаһан байха юм. Ушар юуб гэхэдэ, эстафетын дүнгүүд тамирай дунда һургуулиин, дээдэ һургуулиин болон үйлэдбэриин хэмжээнэй бусад мүрысөөнүүдэй тоосоондо ородог байгаа. Зүблэлтэ засагай үедэ дээдэ һургуулинуудай факультет бүхэнһөө урилдаашад мүрысөөндэ оролсодог һэн. Мүн хүдөөгэйшье һургуулинууд заатагүй хабаадуулагдадаг бэлэй.
Гэхэ зуура, һүүлэй жэлнүүдтэ энэ эстафетэ тамирай спартакиадануудай бүридэлһөө гаргагдажа, хабаадагшадай тоо жэл бүри үсөөрнэ. Нёдондо оройдоол 550 хүн хабаадаа бэлэй.
72 жэлэй туршада тус урилдаанда Улаан-Үдэ хотын дунда һургуулинууд түрүү һууринуудые эзэлдэг һэн. Улаан-Үдын 65-дахи һургуулиин эрхим багша Надежда Никифоровагай шабинар эгээл олон дахин амжалта туйлаһан байна. Мүн Буряадай гүрэнэй ехэ һургуулиин, ВСГУТУ-гай, Улаан-Үдын түмэр харгын болон индустриальна техникумүүдэй оюутад, Авиазавод, Приборбарилгын нэгэдэлэй, ЛВРЗ болон бусад эмхинүүдэй ажалшад амжалтатайгаар хабаададаг бэлэй.
Хүнгэн атлетикээр эстафетэ тамирай хаһа нээлгэнэй һүлдэ тэмдэг болодог һэн. Тиимэһээ энэ хэмжээндэ эртээнһээ бэлдэжэ эхилдэг байгаа. Урилдаанда хабаадаһаар, хүн зон тамираар бэеэ һоридог заншалтай болодог бэлэй.
“Буряад үнэн” сониной эмхидхэһэн мүрысөөнһөө олон тамиршад эхин харгыгаа абаһан байдаг. Эдэ хэд бэ гэхэдэ, 1980 оной Олимпиадада хабаадагша Павел Яковлев, “Хани барисаан - 1984” гэһэн уласхоорондын мүрысөөнэй вице-чемпион, гүрэнэй олон дахин чемпион Надежда Мироманова, СССР-эй олон дахин чемпион, урилдаагаар Дэлхэйн таба дахин абарга Татьяна Позднякова, СССР-эй, Россиин чемпион Наталья Соломинская, СССР-эй, Европын, Россиин Кубогые илагша, Россиин 5-дахи абарга Геннадий Темников, Гапас Шарипов, Александра Воронцова, Павел Лаптев, Евдокия Ли, Роберт Дондубон болон тоогүй олон тамиршад мүн.
Эстафетэ жэл бүри Россиин болон Буряад Уласай түүхын ямар нэгэ үйлэ хэрэгүүдтэ зорюулагдадаг. Тиигэжэ эдиршүүлые, залуушуулые патриотическа хүмүүжэлгэдэ һайн нүлөө үгэнэ. Жэл бүри “Буряад үнэн” Хэблэлэй байшан энэ урилдаа үргэлжэ эмхидхэжэл байдаг.
2018 оной урилдаан Буряад Уласай Тамирай болон залуушуулай бодолгын яаманай дэмжэлтээр үнгэрхэ. Сайд Вячеслав Дамдинцурунов ажалта бүлэгэй суглаа эмхидхэжэ, Буряад Уласай түүхын болон социальна ажаһуудалда урилдаанай удха шанарыень онсолон тэмдэглээ.
- Ондоо бэшэ ямаршье урилдаан иимэ удаан, аяар 72 жэл соо, үргэлжэлэгдөөгүй. Гүрэнэй мэдэлэй Хэблэлэй байшан энэ урилдаа эмхидхэжэ байһаниинь онсо тэмдэглэлтэй. Мүнөө бидэ энэ эстафетэ улам саашань үргэлжэлүүлжэ, шэнэ амисхал оруулжа, үшөө олон зониие хабаадуулдаг болгохо ёһотойбди. Түхэлыень ондоо болгохо, эбээн тэдхэгшэдые һонирхуулан хабаадуулха шухала. Тамирай яаман болон би өөрөөшье энэ урилдаа Буряад Уласай тамирай мүрысөөнүүдэй гаршаг руу оруулха талаар оролдолго гаргахаб, уласай Толгойлогшоһоошье дэмжэлтэ эрихэбди, - гэжэ тамирай сайд мэдээсэбэ.
Сайдай шиидхэбэреэр, тус эстафетэдэ бэлдэлгэ Тамирай яаман болон “Буряад үнэн” Хэблэлэй байшан гээд суг ябуулдаг болохо. Эмхидхэлэй хороон Тамирай яаманай болон хүнгэн атлетикээр федерациин түлөөлэгшэдһөө бүридэхэ, түрүүлэгшээрнь Россиин тамирай мастер Татьяна Белякова табигдаба. Харин ахамад судьягаар Буряадай гүрэнэй ехэ һургуулиин доцент, Россиин тамирай мастер, 1-дэхи категориин судья Надежда Суворова зандаа үлэбэ.
“Буряад үнэн” Хэблэлэй байшан Буряад Уласай Тамирай болон залуушуулай бодолгын яаманда, сайд Вячеслав Дамдинцуруновта энэ үйлэ хэрэг дэмжэһэнэйнь түлөө баярые хүргэнэ. Энэ дэмжэлтээр Буряадай эгээл урданай урилдаанай түүхын шэнэ хуудаһан эхилбэ гээд найдая.
“Буряад үнэн” Хэблэлэй байшан