1860
«Буряад үнэн» Хэблэлэй байшанай шанда хүртэхэ урилдаанай ахамад шүүгшэ, Буряадай гүрэнэй ехэ һургуулиин доцент, Ородой Холбоото Уласай спортын мастер Надежда Суворовагай хэлэһээр, мүрысөөндэ хабаадаха тухай 67 командаһаа мэдүүлгэнүүд ороод байна. Үнгэрһэн жэлэй мүрысөөндэ 55 команда хабаадаа гэжэ һануулнабди. Байгша ондо анха түрүүшынхиеэ сэрэгэй частьнуудай болон Дотоодын хэрэгүүдэй таһагай команданууд хабаадаха. Тиихэдэ хото шадархи аймагуудай команданууд ерэхээр хүлеэгдэнэ.
Агуу Илалтада зорюулагдаһан «Буряад үнэн» Хэблэлэй байшанай шанда хүртэхэ урилдаан 72-дохиёо майн 6-да эмхидхэгдэхэ. Заншалта энэ урилдаан 1946 онһоо эхиеэ абана. Энэ хадаа Буряад Уласта олон зоной хабаадалгатайгаар, тамирай бүхы мүрысөөнүүдэй дунда эгээл урданай түүхэтэй, заншалта урилдаан болоно. Мэдээжэ олон тамиршад эндэһээл спортын амжалтануудые туйлажа эхилһэн юм. Нэрлэбэл, 1980 оной Олимпиадада хабаадагша Павел Яковлев, “Хани барисаан - 1984” гэһэн уласхоорондын мүрысөөнэй вице-чемпион, гүрэнэй олон дахин чемпион Надежда Мироманова, СССР-эй олон дахин чемпион, урилдаагаар Дэлхэйн таба дахин абарга Татьяна Позднякова, СССР-эй, Ородой Холбоото Уласай чемпион Наталья Соломинская, СССР-эй, Европын, Россиин Кубогые илагша, Россиин 5-дахи абарга Геннадий Темников, Гапас Шарипов, Александра Воронцова, Павел Лаптев, Евдокия Ли, Роберт Дондубон болон тоогүй олон тамиршад мүн.
2018 оной урилдаа Буряад Уласай Тамирай болон залуушуулай бодолгын яаман болон «Буряад үнэн» Хэблэлэй байшан эмхидхэхэ. Сайд Вячеслав Дамдинцурунов Буряад Уласай түүхын болон ниигэм дотор урилдаанай удха шанарыень онсолон тэмдэглээ. Эмхидхэлэй хорооной түрүүлэгшээр Ородой Холбоото Уласай мастер Татьяна Белякова томилогдобо.
