1324
Байгша оной майн 4-дэ Дагестан уласай Каспийск хотодо үнгэргэгдэһэн Европын чемпионадта Буряадай түлөөлэгшэд амжалта туйлаба. 53 кг хүрэтэр шэгнүүртэ Стальвира Оршуш алтан медальда хүртэбэ. Тиихэдэ Ирина Ологонова хоёрдохи һуури эзэлбэ.
Буряад Уласай Толгойлогшо Алексей Цыденов басагадай барилдаан хараһан байна гэжэ Ородой Холбоото Уласай барилдаанай федерациин сайтын хэблэлэй албанай мэдээсэлээр дуулганабди.
«Хоолойгүй болотороо, басагадайнгаа түлөө һанаата болооб. Стальвирын барилдахада, һууха, байха байраа оложо шадахаа болёоб. Буряад уласта барилдаан хадаа үндэһэтэнэй тамирай наадан болоно. Тэрэнэй хүгжэлтэдэ бидэ ехэ анхарал хандуулнабди. Бишье бэеэ һорижо эхилээб. Манай тамиршадай туйлаһан амжалта барилдаа улам хүгжөөхэ зорилго түрүүлнэ», - гэжэ Алексей Цыденов тэмдэглэбэ.
Алексей Цыденовэй хэлэһээр, 2019 ондо Буряадта эхэнэрнүүдэй дунда барилдаагаар Ородой Холбоото Уласай чемпионат үнгэргэгдэхэ. Тиихэдэ 2020 ондо сүлөөтэ барилдаагаар Ородой Холбоото Уласай чемпионат үнгэргэхэ тухай хэлсэгдэнэ.
«Буряад Уласай Толгойлогшын шанда хүртэхэ барилдаагаар уласхоорондын мүрысөө хүгжөөхэ гэжэ түсэблэнэбди. Мүрысөөндэ хабаадагшадай тоо улам олошоруулха, тиихэдэ эхэнэрнүүдэй барилдаа мүрысөөндэ оруулха түсэбтэйбди. Дагестан уластай үрдилдэн тэмсэхэ аргатай болохо талаар тамиршадаа бэлджхэбди», - гэжэ Алексей Цыденов хэлэбэ.
Буряад Уласай Засагай газарай хэблэлэй албанай гэрэл зураг
