1332
Үсэгэлдэр, майн 6-да Улаан-Үдэдэ «Буряад үнэн» Хэблэлэй байшанай шанда хүртэхэ хүнгэн атлетикээр урилдаан 72-дохиёо үнгэргэгдэбэ.
1946 онһоо эхиеэ абаһан заншалта энэ урилдаан Буряад Уласта олон зоной хабаадалгатайгаар үнгэргэгдэдэг, тамирай бүхы мүрысөөнүүдэй дунда эгээл урданай түүхэтэй болоно.
Хэмжээ ябуулгын нээлгын баяр ёһололдо Буряад Уласай Тамирай болон залуушуулай бодолгын талаар сайд Вячеслав Дамдинцурунов болон «Буряад үнэн» Хэблэлэй байшанай захирал Баяр Балданов гэгшэд сугларагшадые амаршалаа. Тиихэдэ 81 команданууд энэ мүрысөөндэ хабаадаһан байна.
- «Буряад үнэн» Хэблэлэй байшанай үнгэргэдэг энэ эстафетэ эгээл урданай түүхэтэй. Иимэ удаан сагта бэшэ ямаршье мүрысөөн үнгэргэгдэнэгүй. Тиимэһээ энэ эстафетэ дэмжэхэ тухай шиидхэбэри абаһан байнабди, - гэжэ Вячеслав Дамдинцурунов хэлэбэ.
Эстафетын үнгэргэгдэхэ үдэрһөө урид Буряад Уласай хүнгэн атлетикын федерациин, Тамирай болон залуушуулай бодолгын талаар яаманай, хэблэлэй байшанай түлөөлэгшэд уулзажа, энэ мүрысөөнэй холын хараата түсэбүүд тухай хэлсэһэн байна.
Вячеслав Дамдинцурунов Буряадай гүрэнэй ехэ һургуулида һураха үедөө хүнгэн атлетиклээр норматив нэгэтэ бэшэ тушааһаншье һаа, «Буряад үнэн» Хэблэлэй байшанай эстафетэдэ хабаадажа үзөөгүй байна. Тиигэбэшье тэрэ заатагүй урилдаанда хабаадаха тухайгаа мэдүүлээ. Бурядай тамирай болон залуушуулай бодолгын талаар сайд уласай ажаһуугшадые эдэбхитэйгээр урилдаанда хабаадахыень уряалба.
- Урилдаанда хабаадагшадые олон болгохо хэрэгтэй. Үнгэрһэн зуун жэлэй 70-80-яад онуудта эстафетэдэ 2500 тухай хүн хабаадагша һэн гэжэ ветеранууд хэлэһэн байна. Бидэ мүнөө энэ тоодо бусаха ёһотойбди, - гэжэ сайд тэмдэглэбэ.
Тамирай ямаршье хэмжээ ябуулгада, тэрэ тоодо энэ эстафетэдэ, хабаадалга хадаа болбосоролой эмхинүүд болон үйлэдбэринүүдэй түлөөлэгшэдһөө дулдыдадаг гэжэ мүрысөөнэй ахамад шүүгшэ, хүнгэн атлетикээр спортын мастер Надежда Суворова болон хүнгэн атлетикээр Буряадай федерациин хүтэлбэрилэгшэ, уласхоорондын спортын мастер Геннадий Темников тэмдэглэбэ. Надежда Суворова «Буряад үнэн» Хэблэлэй байшанай шанда хүртэхэ хүнгэн атлетикээр эстафетэдэ 28-дахияа ахамад шүүгшэ болоһон байна гэжэ тэмдэглэлтэй.
- Бэеэ һоридог зон наһатай болоошье һаа, хүнгэн, шуран зандаа. Тиимэһээ болбосоролой эмхинүүдэй, үйлэдбэринүүдэй хүтэлбэрилэгшэд заатагүй мүрысөөнүүдтэ командануудые хабаадуулха ёһотой, - гэжэ Надежда Суворова хэлэбэ.
- «Буряад үнэн» Хэблэлэй байшанай шанда хүртэхэ хүнгэн атлетикээр эстафетэ хадаа хүнгэн атлетикээр зунай хаһа нээлгын хэмжээ ябуулгануудай эхин болоно. Манай федераци энээндэ ехэ харюусалгатайгаар хандадаг. Наһанай хизаарлалтаар уласай эгээл шанга тамиршад энэ мүрысөөндэ хабаадана ха юм, - гэжэ Геннадий Темников хэлэбэ.
Эстафетэдэ жэлһээ жэлдэ 42, 47, 49, 65-дахи болон бусад һургуулинууд һайн дүнгүүдые харуулдаг.
«Хүнгэн атлетикэдэ ехэ саг үгтэдэг. Тиимэһээ ехэ харюусалгатайгаар тус мүрысөөндэ бэлэдхэл хэдэгбди», - гэжэ 49-дэхи һургуулиин физкультурын багша Сергей Викулин хэлэбэ.
Энэшье удаа 49-дэхи һургуулиин басагад гурбадахи һуури эзэлһэн байна.
Байгша ондо мүрысөө эмхидхэгшэдэй үүсхэлээр эстафетэдэ хабаадагшад нэмэгдэһэн байна. Тэдэнэй тоодо хотын ажаһуугшадай дунда мэдээжэ болоһон «Беги, Улан-Удэ, беги» гэһэн олониитын эмхиин түлөөлэгшэд урилдаһан байна.
«Гарагай нэгэн бүхэндэ Түбэй стадиондо һорилго үнгэргэдэгбди», - гэжэ эмхиин һоригшо, хүнгэн атлетикээр Ородой Холбоото Уласай мастер Наталья Макарова хэлэбэ.
Хүнгэн атлетикэдэ дуратайшуул Наталья Макаровае Федотова обогоор һайн таниха.
«Буряад үнэн» Хэблэлэй байшанай шанда хүртэхэ хүнгэн атлетикээр эстафетэдэ илагшад:
Тусхай һургуулинуудай дунда 28-дахи санаторно интернат-һургуулиин хүбүүдэй болон басагадай команданууд илаба. Юрэнхы болбосоролой дунда һургуулинуудай дунда 42-дохи һургуулиин хүбүүд, басагад эгээл хурдан байба. Тэдэнэй дунда заншалта ёһоороо түрүүшын шатада гүйлдэһэн Ксения Зубакина (49-дэхи һургуули), Олег Калиберов (51-дэхи һургуули) шагнагдаа.
Дунда мэргэжэлэй һургуулинуудай басагадай дунда уласай олон шэглэлэй колледж түрүү һуури эзэлээ. Удаань багшанарай болон анагааха ухаанай колледжын басагад түрүүлээ. Энэл һургуулинуудай хүбүүдэй дунда илагшад гэхэдэ технологическа, багшанарай, аяншалгын болон туһаламжа үзүүлгын Байгалай колледжын түлөөлэгшэд түрүүшын гурбан һуури эзэлээ. Ехэ һургуулинуудай дунда Буряадай гүрэнэй ехэ һургуулиин болон Зүүн Сибириин гүрэнэй технологиин болон хүтэлбэриин университедэй басагад түрүүлээ. Хүбүүдэй дунда Буряадай гүрэнэй ехэ һургуулиин 1- дэхи команда, Зүүн Сибириин гүрэнэй технологиин болон хүтэлбэриин университедэй болон Буряадай гүрэнэй ехэ һургуулиин хоёрдохи команданууд амжавлта туйлаа.
Үйлэдбэринүүдэй дунда үнгэргэгдэһэн эстафетэдэ Зүүн Сибириин гүрэнэй технологиин болон хүтэлбэриин университедэй эхэнэрнүүдэй команда 3-дахи һуури эзэлээ. Командын бүридэлдэ спортын мастер Эльвира Любарская урилдаа. 2-дохи һуури тамирай хэрэгсэлнүүдэй дирекциин түлөөлэгшэд хүртөө. ТГК-14 эмхиин түлөөлэлһэн эхэнэрнүүд хоёрдохи жэлээ түрүүшын һуури эзэлээ.
Байгша ондо анха түрүүшынхиеэ сэрэгэй частьнуудай болон Дотоодын хэрэгүүдэй таһагай команданууд хабаадаһан байна. Эдэнэй дунда эстафетын бүхы шатада эгээл шанга тулалдаан болоһон байна. Түрүүшын һуури – 46108 сэрэгэй часть, хоёрдохи һуури - 11-дэхи гвардейскэ десантна бригада, гурбадахи һуури – Дотоодын хэрэгүүдэй яаманай спецназай «Гром» команда эзэлээ.
Олониитын эмхинүүдэй дунда үнгэргэгдэһэн мүрысөөндэ «Беги, Улан-Удэ, беги» эмхиин түлөөлэгшэд түрүүшын һуури эзэлээ. Буряад уласай тамирай ветерануудай команда хоёрдохи һуурида хүртөө.
Эстафетын түрүүшын шатада гүйлдэгшэдэй дунда басагад сооһоо Анна Ксенофонтова, хүбүүдэй дунда Николай Вербицкий шагналда хүртөө.
