​Буряадай барилдаашад – Европын чемпионадта

Алексей Цыденов (зүүн гарһаа) тамиршадта шан барюулба

Үнгэрһэн долоон хоногто Дагестанай Каспийск хо­тодо барилдаагаар Европын чемпионат боложо түгэсэбэ. Буряадай барилдааша басагад ялас гэмэ амжалта туйлаа: Стальвира Оршуш алтан медаль­да, Ирина Ологонова мүнгэн медальда хүртэбэд. Буряад Уласай Толгойлогшо Алексей Цыденов зорюута энэ хэм­жээ ябуулгада ошожо, тамиршадай болон һоригшодой баяр хубаалдаһан байна.

Дагестанда гурбан түхэлэй барилдаагаар Ев­ропын чемпионат анха түрүүшынхиеэ үнгэргэгдөө гэжэ хэлэхэ хэрэгтэй. Гре­ко-римскэ, эрэшүүлэй болон эхэнэрнүүдэй тэмсээнүүдтэ Европын 40 гаран гүрэнэй 300 гаран барилдаашад хаба­адаа. Манай басагад энэ ехэ мүрысөөндэ оролсожо, нютаг нугаяа, түрэл гаралаа баяр­луулба гээшэ.

- Буряадайнгаа ба­сагадай түлөө ехэ һанаагаа зобобоб. Стальвирын барил­дахада, һууха байха һуурияа оложо ядааб. Мүн баярлан хашхархадаа, хоолоймни һөөлдэшөө. Манай тамир­шадай иимэ үндэр амжалта­нууд барилдаанда бүри ехэ анхарал хандуулха түлхисэ боложо үгэнэ. Тиихэдэ урга­жа ябаа залуу халаан энэ жэ­шээ дээрэ саашанхи ажабай­далаа зохёохо гээд һанагдана, - гэжэ Алексей Цыденов бая­раа мэдүүлнэ.

2019 ондо Улаан-Үдэдэ эхэнэрнүүдэй дунда, харин 2020 ондо эрэшүүлэй дун­да Ородой чемпионат эм­хидхэхэ түсэбтэй байһанаа Алексей Самбуевич дахинаа һануулба. Гэхэтэй хамта, Бу­ряад Уласай Толгойлогшын шанда хүртэхын түлөө улас­хоорондын мүрысөө бүри үндэр шатада үнгэргэхэ ту­хайгаа мэдүүлээ.

Стальвира Оршуш тус мүрысөөндэ 53 килограмм хүрэтэр шэгнүүртэ барилдаа. Тэрэ Румыниин Естера До­бре болон Венгриин Мерсе­дес Денес гэгшэдые үгтэһэн сагай үшөө дууһаагүй бай­хадань шүүгээ. Мүн хахад финалай уулзалгада Польшо гүрэнэй Катаржина Кравчук гэгшэтэй ана-мана тэмсэ­жэ, тэрээнһээ оройдоол нэгэ балл үлүү абаад диилэбэ. Алтан медалиин түлөө уул­залгада дэлхэйн хоёр дахин чемпион болоһон Беларусь гүрэнэй Ванеса Каладзинска­яе нюрган дээрэнь хэбтүүлжэ шадаа.

- Энэ тамиршанда 2017 ондо уласхоорондын мүрысөөндэ шүүгдэшэһэн байгааб. Һоригшо Максим Максимович Молонов болон Евгений Артурович Павлов гэгшэдтэй тэрэ барилдаагаа наринаар шэнжэлжэ үзөөбди. Мүнөө заал һаа шүүжэ шада­хаб гээд хибэс дээрэ гарааб. Алдуугаа заһаха ажал яһала үрэ дүнтэйгөөр хэһыемни мүрысөөн харуулаа, - гэжэ ба­яртай Стальвира мэдүүлнэ.

Анха түрүүшынхиеэ Ев­ропын чемпион болоһон Бу­ряадай тамиршан Каспийск хотодо һайн дүнгүүдые ха­руулнаб гэжэ һануулаа. Нё­дондо Дагестанда тэрэ Оро­дой чемпионой нэрэ зэргэдэ хүртөө бэлэй. Харин мүнөө бүри ехэ амжалта туйлаба гэ­эшэ. “Номто” гэһэн спортын клубай, һоригшодой ашаар аргагүй ехэ ажал хэгдээ гэжэ Стальвира Оршуш мэдүүлээ.

Дэлхэйн чемпионадуудта гурба дахин мүнгэн медаль абаһан Ирина Ологонова энэ удаа 57 килограмм хүрэтэр шэгнүүртэ барилдаһан бай­на. Швециин Сильвия Пите­рые болон Беларусиин За­лина Сидаковае бэлэхэнээр шүүгээд, хахад финалай уул­залгада Азербайджанай Алё­на Колесник гээшые 3:2 гэһэн тоотойгоор илаа. Түгэсхэлэй уулзалгада Болгариин Биля­на Дубовада шүүгдэжэ, Ири­на хоёрдохи шангай һуури эзэлбэ.

Хибэс дээрэ Ирина Ологонова (баруун гарһаа)

- Мүнгэн медаль абаһандаа баяртайб. Юуб гэ­хэдэ, мүрысөөнэй урда хэдэн үдэр халуурһан байнаб. Мүн урда жэлнүүдтэ гэмтээһэн үбдэгни дахин үбдэжэ эхи­лээ. Финал тухай хэлээ һаа, энэмнай ехэ харюусалгатай уулзалга ха юм. Тиимэһээ түрүүшын алдуу хэһэн та­миршан шүүгдэхэ байгаа. Алдаһанайнгаа һүүлдэ түргөөр хүсэхэ гэжэ орол­донош. Энэ үедэ угаашье түргэдэжэ, дахинаа баллну­удые алдааб, - гэжэ Ирина Ологонова хэлэнэ.

Тус мүрысөөндэ Ородой барилдааша басагад най­ман медаль абажа шадаа. Стальвира Оршушһаа гадна Европын чемпионой нэрэ зэргэдэ Анастасия Братчи­кова хүртөө. Греко-римскэ түхэлэй барилдаагаар Оро­дой тамиршад дүрбэн алтан медаль абаһан байна. Мүн эрэшүүлэй дунда Ородой су­глуулагдамал команда зурга­ан алтан медальтай юм.

- Эхэнэрнүүдэй ко­манда энэ мүрысөөндэ гур­бан алтан медаль абаха гэжэ түсэблөөд байгаабди. Һанаһандаа хүрэбэгүйбди. Гэ­бэшье Олимпиин нааданууд­та орохо бүхы шэгнүүрнүүдтэ медаль абаһандаа баярла­маар. Юуб гэхэдэ, 2020 оной Олимпиада тухай мүнөөнһөө хойшо һанажа эхилхэ хэрэгтэй. Чемпион болоһон баса­гаднай, илангаяа Стальвира Оршуш энэ мүрысөөндэ ехэ һайн барилдаа харуулжа, бултыемнай баярлуулба, - гэжэ эхэнэрнүүдэй суглуу­лагдамал командын ахамад һоригшо Юрий Шахмурадов тэмдэглээ. 

Европын чемпионадай сайтһаа гэрэл зурагууд абтаба