​Буряадай тамиршад Европын хэмжээндэ шалгараа

Эрдэм Ирдынеев болон Светлана Гомбоева

Италиин Роверетто хо­тодо залуушуулай бо­лон эдиршүүлэй дун­да Европын Кубогта хүртэхын түлөө нэгэдэхи ша­тын мүрысөөн үнгэрһэн до­лоон хоногто боложо түгэсэбэ. Эндэ Буряадаймнай тамиршад найман медальда хүртэһэн байна.

2000-2002 онуудай эдиршүүлэй дунда мүрысөөндэ Түнхэн аймагай Аршаанай дун­да һургуулиин 11-дэхи ангиин һурагша Виктория Харитонова түрүүлжэ гараа. Финалда тэрэ Италиин Элиза Эстер Гуэрэсса гэгшые 7:1 гэһэн тоотойгоор шүүһэн байна.

Виктория Харитонова (дундань)

Энэ наһанай хүбүүд, баса­гад 2018 оной октябрь һарада эдиршүүлэй Олимпиин наада­нуудта хабаадаха аргатай юм. Һур харбалгаар Ородой суглуулагдамал команда бүхы путёв­конуудые абанхай. Тиигэжэ нэгэ басаганай һуурида хэдэн тамиршад оролсохоо тэмсэнэ. Тиимэһээ ямаршье мүрысөөндэ түрүүлбэл, тамиршан ехэ арга боломжотой болоно бшуу. Виктория Харитонова Италида түрүүлжэ, Олимпиин наадануудта дүтэ болобо гэжэ хэлэмээр.

1998-2001 онуудай залуу­шуулай мүрысөөндэ Буряадай тамиршад бусад медальнуудые абаһан байна. Хубиин тоосоон­до Гэрэлма болон Константин Эрдыниевтэнэй шаби Светла­на Гомбоева чемпионой нэрэ зэргэдэ хүртөө. Мүн гурбадахи һуурида Ариуна Будаева гараа. Эдэ хоёр басагаднай Франциин түлөөлэгшэдые шүүжэ шадаа.

Үбэр Байгалай хизаарай бу­ряад хүбүүн Содном Будаев түрүү һуурида гараа гээд хэлэл­тэй.

Командна тоосоондо хүбүүдэй суглуулагдамал ко­манда нэгэдэхи һуури эзэлээ. Буряадай түлөөлэгшэ Эрдэм Ирдынеев болон Үбэр Байгалай хизаарай тамиршад Содном Бу­даев ба Зорикто Жаргалов гэг­шэдтэй хамта чемпион боложо тодороо.

Басагадай дунда команда гурбадахи һуурида гараа. Эндэ Буряадай Светлана Гомбоева ба Ариуна Будаева, Үбэр Байгалай хизаарай Татьяна Плотникова гэгшэд командын бүридэлдэ оруулагдаһан байна.

Командна микст харбалгада Ород гүрэнэй тамиршад хоёр мүнгэн медаль абаа. Классическа номо һуршаар харбалгада Светлана Гомбоева Эрдэм Ир­дынеев хоёр илагшад болоно. Мүн блочно номо һуршаар харбалгада Буряадаймнай Сергей Шенхоров Москвагай Елизавета Королёватай харбаад, хоёрдохи һуурида гараа.

Эдиршүүлэй болон залуу­шуулай дунда Ородой чемпио­нат Уфа хотодо июниин 1-6-ай үдэрнүүдтэ анха түрүүшынхиеэ болохоор хараалагдана. Буряадаймнай тамиршад һайн дүнгүүдые харуулха бэзэ гээд найдагдана.