Августын 3-5 үдэрнүүдтэ Одинцово хотодо барилдаагаар Ородой чемпионат боложо түгэсэбэ. Буряадай тамиршад хибэс дээрэ бирагүйдэбэ. Тэдэ оройдоол нэгэ хүрэл медаль абаа.
Тус мүрысөөн эгээл олон тамиршадые суглуулаа гэбэл алдуу болохогүй. 43 можо хизаарнуудай 377 барилдаашад хибэс дээрэ гараа. Тэдээн сооһоо 12 буряад тамиршадые нэрлэмээр.
65 килограмм хүрэтэр шэгнүүртэ Даша Шарастепанов эгээл һайн дүн харуулаа. Түрүүшынгээ уулзалга тэрэ шүүгээд, һүүлдэнь чемпионой нэрэ зэргэдэ хүртэһэн Ахмед Чакаевта булигдаа. Хоёрдохи үдэртэнь гурбадахи һуури эзэлхын түлөө Саха-Яхад, Дагестан болон Чечен Уласуудай гурбан барилдаашаниие илажа гараа.
Даша Шарастепанов Аха аймагһаа уг гарбалтай юм. Буряадай гүрэнэй хүдөө ажахын академидэ һурахаһаа абаад, мүнөө болотор Валерий Ивановай ударидалга доро һорилго хэнэ.
Буряадай барилдаанай урдаа хараха тамиршан Александр Богомоев бүхы шадалаа гаргажа шадаагүй. Тэрэ 61 килограмм хүрэтэр шэгнүүртэ Ородой чемпион болоһон Дагестанай Магомедрасул Идрисовтэ шүүгдэжэ, шангай һуурида гаража шадаагүй.
Алексей Сабидаев, Булат Баясхалонов, Баяр Цыренов, Цыбик Максаров гэгшэд гурбадахи һууринуудые эзэлхэ аргатай һэн. Теэд энэ үдэр ондоо можо хизаарнуудай тамиршадай аза талаан үлүү байшоо.
“Борцы Бурятии” бүлгэмһөө гэрэл зураг абтаба