Санкт-Петербург хотодо уласхоорондын хэмжээнэй хэдэн мүрысөөнүүд үнгэргэгдэжэ түгэсэбэ. Ородой суута шатаршан Виктор Корчнойдо тэдэ зорюулагдаа. Буряадай тамиршад һайн дүн харуулжа, спортдо дуратайшуулые баясуулба.
Үхибүүдэй дунда мүрысөөн “Петербургын зун” гэжэ нэрлэгдээ. Үхибүүдэй дунда Ородой Кубогта хүртэхын түлөө тулалдаануудай нэгэ шата боложо үгөө. Буряадаймнай эдир шатаршад хоёр дахин түрүү һуурида гараа.
9 хүрөөдүй наһанай шатаршадай дунда Номин Дармаева чемпионой нэрэ зэргэдэ хүртөө. Тэрэ 7,5 очко 9 нааданда абаа. Хоёрдохи һуури эзэлһэн тамиршан аяар нэгэ очко дутуу абаһан байна. Номина хадаа августын эхиндэ Екатеринбург хотодо болоһон шатада баһа чемпионой нэрэ зэргэтэй болоо һэн гээд һануулая.
13 наһа хүрөөдүй тамиршадай дунда Дарима Саргаева нэгэдэхи һуури эзэлжэ, түрүүшынгээ томо амжалта туйлаба. Тус мүрысөөндэ Дарима 7,5 очко абаа гээд хэлэлтэй.
Эдэл үдэрнүүдтэ ехэшүүлэй дунда Ородой Кубогта хүртэхын түлөө мүрысөөнэй нэгэ шата эмхидхэгдээ. Эндэ Жамсаран Цыдыпов 7 очко абажа, дүрбэдэхи һуури эзэлээ. Нэгэдэхи болон гурбадахи һууринуудта Белоруссиин шатаршад гараа. Хоёрдохи һуури Кемерово хотын Максим Чигаев эзэлээ.
Дүрбэдэхи һуури эзэлбэшье, Жамсаран һайн дүн харуулаа гэжэ хэлэхэ хэрэгтэй. Юуб гэхэдэ, тэрэ уласхоорондын гроссмейстер болохын түлөө нэгэ балл абаа. Иимэ ехэ үндэр нэрэ зэргэтэй болохын түлөө гурбан баллтай байха ёһотой юм.
Ургажа ябаа залуу шатаршад энэ томо мүрысөөндэ баһа һайн дүнтэйгөөр хабаадаа. Дандар Шобоев 6 очко абаа, Эрдэм Хубукшанов болон Тумэн Цыбиков 5,5 очкотойгоор тулалдаануудаа дүүргээ. Екатеринбург болон Санкт-Петербургда болоһон хоёр мүрысөөнэй удаа Эрдэм ба Тумэн гэгшэд ФИДЕ-гэй мастер гэһэн нэрэ зэргэдэ хүртөө.
Ородой хойто ниислэлдэ болоһон тулалдаануудта 22 хари гүрэнэй болон Ородой 10 гаран можо, хизаарнуудай 500 гаран шатаршад хабаадалсаа.
Авторай болон Санкт-Петербургын шатарай эблэлэй зурагууд