​​Дэлхэйн түрүүшүүлэй дунда

Ородой боксын федерациин зураг

18 наһа хүрөөгүй тамиршадай дунда дэлхэйн чемпионадта Буряадай тамиршан Ангелина Кабакова хоёрдохи һуури эзэлжэ, үнгэрһэн долоон хоногой эсэстэ гэртээ бусаба. Залуу һүрэгэй дунда дэлхэйн чемпионат Венгри Уласай ниислэл болохо Будапешт хотодо августын 21-31 үдэрнүүдтэ үнгэргэгдөө. «Номто» гэһэн спортын клубай гэшүүн Ангелина Кабакова Ородой суглуулагдамал командын бүридэлдэ оруулагдажа, мүрысөөнд хабаадаһан байна. Тэрэ 69 килограмм хүрэтэр шэгнүүртэ ринг дээрэ гаража, дүрбэн уулзалга үнгэргөө. Хитадай Тайбэйн Су Пин Хо гэгшые сагай дүүрээгүй байтарнь шүүжэ гараа. Казахстанай Майя Бейсебаева, Германиин Алина Попп гэгшэдые илажа, финалда ороо. Ганса Канадын түлөөлэгшэ Чарли Каванагта шүүгдэжэ, мүнгэн медальда хүртөө.

Ангелина Кабакова хадаа Бадма Бадмаевай һорилго доро бэлэдхэл хэнэ.

Энэ тэмсээндэ Ородой тамиршад командна тоосоондо түрүүшын һуурида гараа. Бүхы дээрээ 6 алтан, 5 мүнгэн болон 2 хүрэл медальнуудые абажа шадаа. Джамбулат Бижамов, Руслан Колесников, Игорь Фёдоров, Алексей Дронов, Анастасия Шамонова болон Анастасия Рыбак гэгшэд чемпионой нэрэ зэргэнүүдтэ хүртөө.