​Инна Степанова хүрэл медальда хүртэбэ

Европын чемпионадай сайтһаа абтаһан гэрэл зураг

Польшо Уласай Легниц хотодо Европын чемпионат боложо түгэсэбэ. Буряадаймнай мэдээжэ тамиршан, Олимпиин наадануудай мүнгэн медальда хүртэһэн Инна Степанова гурбадахи һуури эзэлһэнэй түлөө хүрэл медальда хүртэбэ.

Августын 27- сентябриин 2-ой үдэрнүүдтэ Европын чемпионат болоо гээд хэлэлтэй. Ородой суглуулагдамал командын бүридэлдэ Буряадай хоёр тамиршад оруулагдаһан байна. 2018 оной Ород гүрэнэй чемпион Анна Балсукова болон Инна Степанова гэгшэд болоно. Эгээл ехэ амжалта 2016 оной Олимпиин наадануудай мүнгэн медальда хүртэһэн Инна Степанова туйлаа. Тэрэ командна микст тоосоондо шалгараа. Буряадай харбааша Үбэр Байгалай хизаарай Арсалан Балдановтай хамта Швейцариин, Германиин болон Турциин командануудые илажа гараа. Ганса Франциин мэргэшүүлдэ шүүгдээ.

Тус мүрысөөндэ Инна Степанова үшөө хоёр медаль абаха аргатай байгаа. Теэд 4-дэхи болон 5-дахи һууринууд баһа муу бэшэ бшуу. Командна тоосоондо Ородой эхэнэрнүүд гурбадахи һуури эзэлхын түлөө тулалдаанда Турциин басагадта шүүгдээ. Хубиин тоосоондо Инна ганса Даниин түлөөлэгшэ Майя Ягер гэгшэдэ булигдаад, 5-дахи һуурида гараа.

Европын чемпионой нэрэ зэргэдэ Ородой эрэшүүлэй команда хүртөө. Үбэр Байгалһаа уг гарбалтай Арсалан Балданов болон Галсан Базаржапов, Свердловско можын Виталий Попов гэгшэд алтан медаль абаа.

2019 ондо Минск хотодо үнгэргэгдэхэ Европын хоёрдохи наадануудта энэ мүрысөөн шэлэн абалгын шата боложо үгөө. Польшодо хубиин тоосоондо 16 эрхим тамиршанай тоодо ороһон хүнүүд Минск ошохо эрхэдэ хүртөө. Тиихэдэ командна тоосоондо 8 эрхим команда баһа хабаадаха эрхэтэй болоо. Ородой команданууд урдаа табиһан зорилгодоо хүрэжэ, хүсэд бүридэлөөрөө Европын наадануудта тулалдаха.

Ород гүрэнэй түрүү тамиршад энээгээр 2018 оной зунай халааниие дүүргээгүй. Юуб гэхэдэ, сентябриин 12-15-ай үдэрнүүдтэ Улаан-Үдэ хотодо Ородой Кубогта хүртэхын түлөө мүрысөөн болохоор хараалагдана. Һур харбалгаар Ород гүрэнэй федерациин хүтэлбэрилэгшэ Владимир Ешеев Буряадта айлшалха тухайгаа мэдүүлээ. Уласай Засагай газарай хүтэлбэрилэгшэдтэй тэрэ уулзажа, һур харбалгын хүгжэлтэ тухай хөөрэлдөө эмхидхэхэ юм.