1150
Спортын яаманай сайтһаа гэрэл зураг абтаба
2019 ондо Буряад Уласта һур харбаанай түб барижа эхилхэ. Тус түб болбол Ородой Холбоото Уласай дэбисхэртэ ори гансахан бүрин бүтэн лукодром болохо.
Уласхоорондын стандартда тааруулагдаһан тэрэ барилгада федеральна бюджедһээ мүнгэн һомологдохо. Буряадай Толгойлогшо Алексей Цыденовэй болон Буряад Уласай Спортын ба залуушуулай бодолгын яаманай Россиин Спортын яамантай нягта харилсаатайгаар хүдэлһэнэй ашаар иимэ шиидхэбэри абтаба.
Энэ хэрэгтэ Буряадай һур харбаашадай үндэр амжалтанууд ехэ нүлөө үзүүлээ юм.
– 2016 оной Рио-де-Жанейродэ үнгэрһэн Олимпиин зунай наадануудта мүнгэн медальда хүртэһэн Инна Степановае онсо тэмдэглэхэ хэрэгтэй. Тиихэдэ гүрэнэй суглуулагдамал командын гол хубинь манай уласай тамиршадһаа бүридэнэ ха юм, - гэжэ спортын сайдай орлогшо Иван Козырев хэлэнэ.
Һур харбаанай һургуули Улаан-Үдэ хотын Октябрьска районой Жердевэй гудамжын ба Барилгашадай үргэн сүлөөгэй уулзуурта баригдаха. Тус түб Ород гүрэнэй тамиршадай бэлдэлгын гол түбынь болохо юм. 2020 ондо барилга дүүрэхэ ёһотой.
Автор: Бадма ЖАБОН
