Һаяын үдэрнүүдтэ Буряадай футбол наадагшад хэдэн амжалтануудые туйлаба. 2007-2008 онуудай үхибүүд Эрхүүдэ шалгараа. Мүн 2009 оной хүбүүд һайнаар бүхэроссиин мүрысөөндэ Анапа хотодо наадаа. Тиихэдэ Буряадай Росгвардиин гэшүүд эмхиингээ тулалдаануудта хоёрдохи һуурида гараа.
Эрхүү. Регион хоорондын “Алтан намар” гэһэн мүрысөөн 16 команда суглуулаа. Улаан-Үдэ хотын спортын 5-дахи һургуулиин хүбүүд өөрын бүлэг соо гурбан илалта туйлаа. Тэдэ Эрхүү хотын “Байкал-08” (2:1), “Рекорд” (12:0) командануудые болон Ангарскын наадагшадые (5:0) шүүһэн байна.
Хахад финалай нааданда Буряадай тамиршад Эрхүү хотын “Байкал” командые 3:1 гэһэн тоотойгоор шүүжэ гараа. Һүүлшын түгэсхэлэй нааданда Черемхово хотын эдир футболистнуудые 4:0 гэһэн тоотойгоор илажа гараа.
Эрхим наадагшадай тоодо Буряадай хоёр тамиршан ороо. Эдэ хэд бэ гэбэл, добтологшо Владимир Бусовиков болон хамгаалагша Владислав Комбаев гэгшэд болоно.
Анапа. Хара далайн эрьедэ “Томо одод бага одонуудай харгы гэрэлтүүлнэ” гэһэн бүхэроссиин хуралдаанай финальна шата үнгэргэгдэбэ. Ород гүрэнэй мэдээжэ футболистнууд түрэл нютаг можонуудтаа багашуулай дунда мүрысөө эмхидхэжэ, өөһэдын бэлэг сэлэгүүдые барюулна. Мүнөө жэлэй хэмжээндэ 60 гаран урдаа хараха тамиршад өөрын мүрысөө эмхидхээ. Тэндэ шалгарһан команданууд Анапада сугларһан байна.
Ородой суглуулагдамал командын гэшүүн Владимир Гранат түрэл Улаан- Үдэ хотодо эгээл иимэ мүрысөө 6 жэл соо үнгэргэнэ. Тэндэ түрүүлһэн “Локомотив” командын хүбүүд Анапа ошохо эрхэдэ хүртөө. Ургажа ябаа залуу наадагшадые Владимир Гранат өөрынгөө мүнгөөр энэ мүрысөөндэ эльгээһэн байна.
Буряадай “Локомотив” 8 командаһаа бүридэһэн бүлэг соогоо 5-дахи һуури эзэлээ. Белая Калитва, Минеральные Воды болон Пермь хотонуудай командануудые илажа шадаа. Мүн Москва, Махачкала, Старая Русса, Екатеринбург командануудта шүүгдээ.
Мүрысөөнэй гуримаар, эндэ ерэһэн бүхы команданууд, наадагшад ямар бэ даа шан абаад гэртээ ошохо аргатай байгаа. Тиигэжэ Буряадай наадагшад “Виктор Лосевой одон” гэһэн шангай түлөө тулалдаа. Эдэ наадануудта 4-5-дахи һууринуудые эзэлһэн команданууд хабаадаа. Курск болон Мелеуз хотонуудай наадагшадые шүүжэ, тусхай Кубогта манай “Локомотив” команда хүртөө.
Үшөө тиихэдэ мүрысөөнэй үедэ һонирхолтой хэмжээ ябуулганууд үнгэр- гэгдөө. Ородой суглуулагдамал командын эгээл томо одон Артём Дзюба болоод байнхай. Тэрээнэй нэрээр “Дзюбиада” гэһэн хэмжээндэ Буряадай “Локомотивай” гэшүүн Вадим Игнатьев шалгаржа, толгойгоороо олон бүмбэгэ сохижо оруулһанай түлөө “ДзюБАШКА” гэһэн гол шанда хүртөө.
“Локомотив” командын болон 5-дахи спортын һургуулиин зураг