Эржена Очирова
Хүүгэдэй уласхоорондын нааданууд Хитадай Үбэр Монголой Ордос хотодо үнгэрһэн долоон хоногто эмхидхэгдэбэ. Буряадаймнай 40 хүүгэд тэндэ хабаадажа, 30 гаран медальтай гэртээ бусаа.
Буряад Уласай Спортын болон залуушуулай хэрэгүүдэй талаар яаманай таһагые даагша Баир Дашибальжировай хэлэһээр, хүүгэдэй уласхоорондын нааданууд 2009 онһоо эхиеэ абана.
Монголой, Үбэр Монголой болон Буряад Уласай спортын түлөө харюусадаг албанууд иимэ наада үнгэргэхэ тухай хэлсээ баталһан байна. Эгээл түрүүн Монголой тала энэ наада эмхидхэгдээ бэлэй. Манай Буряадта хүүгэдэй нааданууд 2011 болон 2015 онуудта үнгэргэгдөө. Наада эмхидхэгшэд өөрын дураар спортын зүйлнүүдые оруулна, - гэжэ Баир Дашибальжиров хөөрэнэ.
8-дахияа болоһон хүүгэдэй наадануудта 300 гаран тамиршад хабаадаһан байна. Буряадай тамиршад һур харбаанай, барилдаанай, боксын, дзюдогой, волейболой, хүнгэн атлетикын, шэрээгэй теннисэй мүрысөөнүүдтэ оролсоо.
Барилдаашадай абьяас бэлиг
Барилдаанай мүрысөөндэ буряад үхибүүд һайн дүнгүүдые харуулаа. Тэдэ аяар 9 медаль абажа шадаа.
Гурбадахи һууринуудые Аюр Нимаев, Илья Жибалов болон Александра Просвирина гэгшэд эзэлээ. Шангай хоёрдохи һуурида Сарюна Дондокова гараа. Баир Баяндуев, Жаргал Баяндуев, Булат Цыренжапов, Дамдин Цыренжапов болон Тумэн Бодиев гэгшэд чемпионой нэрэ зэргэнүүдтэ хүртөө.
Нэгэдэхи һуури эзэлһэн Баир Баяндуев Баргажан аймагай Улан нютагта ажаһуудаг юм. Уласай хүүгэдэй түрүүшын наадануудта тэрэ баһа түрүүлһэн байгаа.
Зургаан жэлэй туршада барилдаагаар бэеэ һориноб. Минии багша Геннадий Бубеев юм, - гэжэ Баир Баяндуев хөөрэнэ.
Булта шангай һуури эзэлээ
Буряад Уласые түлөөлһэн бүхы һур харбаашад медальнуудтай гэртээ бусаба. Эгээл ехэ амжалта Сэлэнгэ аймагай Ташарай һургуулиин 10-дахи классай шаби Эржена Очирова туйлаа. Тэрэ хоёр алтан, нэгэ мүнгэн медальнуудые абаба. Энэ мүрысөөндэ Эржена хубиин болон командна микст тоосоондо түрүүлээ. Аюна Манханова болон Вера Бугдаева гэгшэдтэй хамта командна тоосоондо хоёрдохи һуурида гараа.
Ташар һууринда Эржена зургаан жэл соо һур харбалгаар бэеэ һорино. Велингтон Юрьевич болон Дулма Аюшеевна Иринцеевтэн багшанарынь болоно гээшэ.
Жэл бүри 7-10 медаль шүүдэгби. Бүхы амжалтанууд уласай хэмжээндэ туйлагдаа. Мүнөө одоошье Буряадһаань холо газарта шалгарбаб. Сентябрь һарын эхиндэ манай түрэл Сэлэнгэ аймагтамнай болоһон уласай түрүүшын хүүгэдэй наадануудта алтан медаль абажа шадааб. Тиимэһээ түрэл газар дайдын сахюусад удаадахи амжалтануудыем үршөөгөө ёһотой, - гэжэ Эржена Очирова хөөрэнэ.
Руслан Серебряков командна микст тоосоондо хоёрдохи һуури эзэлһэн байна. Буряадай хүбүүдэй команда гурбадахи һуури эзэлээ. Хүрэл медальнуудта Руслан Серебряков, Батор Маланов болон Бато Доржиев гэгшэд хүртөө.
Бусад амжалтанууд
Дзюдо барилдаагаар Буряадай табан түлөөлэгшэ гурбадахи һууринуудые эзэлээ. Эдэ хэд бэ гэбэл, Андрей Климов (Селенгинск), Арсалан Тогочиев, Даниил Сидлер (хоюулаа Улаан-Үдэ), Татьяна Кукшинова (Корсаково) болон Александра Пляскина (Селенгинск) гэгшэд болоно.
Дзюдо барилдаашад
Хүнгэн атлетикээр мүрысөөндэ Артём Чипибузов 1500 метр зайда түрүүлжэ гараа. Олег Калиберов, Яна Семагина, Егор Щербаков болон Алина Демьяненко гэгшэд урилдаанда хүрэл медальнуудта хүртөө. Мүн тиихэдэ эстафетэдэ Буряадай хүбүүд гурбадахи һуури эзэлээ.
Хүүгэдэй удаадахи нааданууд 2019 ондо Буряад Уласта болохоор хараалагдана.
Спортын яаманай гэрэл зурагууд