​​Эдиршүүлэй олимпиадаһаа – хоёр мүнгэн медаль

Анастасия Деревягина

Аяар холын Аргентинэдэ эдэ үдэрнүүдтэ эдиршүүлэй дунда Олимпиин нааданууд үнгэргэгдэжэ байна. Дэлхэйн томо нааданууд­та Буряадай гурбан тамиршан хабаадана гэжэ мэдээсээ һэмди. Сагаалса буудалгын мүрысөөндэ Яна Енина болон Анастасия Деревягина гэгшэд мүнгэн ме­дальнуудта хүртэжэ, спортдо дуратайшуулые аргагүйгөөр баярлуулһан байна.

Яна Енина пистоледээр буудадаг тамиршадай дун­да мүрысэһэн байна. Эдэ наадануудта тэдэ 10 метр зайда эгээл мэргэшүүлые элирүүлээ. Олимпиин ха­лаанай спортын уласай һургуулиин шаби шадамар бэрхээр буудажа, амжалта туйлаа. Александр Степа­новай бэлдэһэн басаган фи­нальна шатада 235,7 очко абажа шадаа. Түрүү һуури эзэлһэн Индиин Маню Бхакерһаа оройдоол 0,6 очко багаар абаһан байна гээшэ.

Мүрысөөнэй үедэ бэр­хэшээлтэй ушарнууда­ар дайралдааб. Хэдэн да­хин һүүлшын боложо, мүрысөөгөө эртээр дүүргэхэ аргатай байгааб. Энэ орёо байдалнуудта бэеэ гартаа барижа шадааб, - гэжэ Яна Енина мэдүүлнэ. – Үшөөшье һайнаар буудаха байгааб. Ганса 75-80 процентээр өөртөө урматайб. Мүнөөдэр олон алдуунуудые гаргааб.

Яна Енина мүрысөөнэй үглөөгүүр гэртээ эжыдээ хонходоһоноо сурбалжалаг­шадта мэдүүлээ. Тиимэһээ абаһан “алтаяа” гэр бүлэдөө, һоригшодоо зорюулнаб гэжэ хэлээ.

Яна Енина

Винтовкоор буудадаг Анастасия Деревягина ху­биин тоосоондо шангай һуури эзэлжэ шадаагүй. Тэрэ 6-дахи һуури эзэлһэн байна.

Эдиршүүлэй Олимпиада­да командна микст тоосоон­до ондо ондоо гүрэнүүдэй түлөөлэгшэд нэгэ команда болгогдоно. Тиигэжэ Анаста­сия Мексикэ гүрэнэй Эдсон Исмаил Рамос Рамирес гэг­шэ буудагшатай нэгэ коман­да боложо тодороо. Эдэ хоёр ехэ һайнаар буудажа, финал­да орожо шадаа. Олимпиин орьёлдо гаража ябатарнь, Монголой басаган Энхмаа Эрденэчулуун болон венгр хүбүүн Залан Перкелер гэг­шэд тогтообо. Тиигэжэ Ана­стасия Деревягина мүнгэн медаль абаһан байна.

Һур харбагша Виктория Харитонова командна микст тоосоондо 7-дохи һуурида гараа. Эхин шатада тэрэ 8-дахи дүн харуулһан байна. Энэ шатада 25-дахи һуури эзэлһэн Бангладеш гүрэнэй тамиршантай нэгэ коман­дын бүридэлдэ оруулагдаа. Дунда Азиин харбааша нэгэ бага тулюур байжа, гурба­дахи шатада тэдэ шүүгдээ. Эдэниие шүүжэ гараһан Франциин басаган болон Ис­паниин хүбүүн удаань Олим­пиин чемпионууд боложо тодороо. Үнгэрһэн һүни Вик­тория Харитонова хубиин тоосоондо хабаадалсаа.

Буудалгын спортын зүйлнүүдэй уласхоорондын федерациин зурагууд