Үнгэрһэн амаралтын үдэрнүүдтэ Улаан-Үдэдэ 1999- 2001 онуудай залуушуулай дунда Буряад Уласай чемпионат эмхидхэгдэбэ. Мэдээжэ һоригшо, бэлигтэй сурбалжалагша Валерий Манзаракшеевич Сыдеевэй мүнхэ дурасхаалда зорюулагдаа.
Нээлгын баяр ёһололдо Валерий Сыдеев тухай олон һайхан үгэнүүд хэлэгдээ. Олон тоото хүндэтэ айлшад барилдаа харахаяа сугларһан байна.
57 килограмм хүрэтэр шэгнүүртэ Хэжэнгэһээ уг гарбалтай Балдан Дондоков Ананда Дашиевые илажа гараад, түрүү һуури эзэлээ. Тус мүрысөөндэ һайн барилдаа харуулһан Балдан Дондоков “эрхим барилдаашан” гэжэ нэрлэгдээд, “Буряад үнэн” Хэблэлэй байшангай мүнгэн шанда хүртөө.
Алдар Мункуев, Эрдэм Шарастепанов, Никита Жаргалов, Василий Оглонов, Арсалан Ванкеев, Артём Ларионов, Андрей Елбаскин, Амгалан Бакшеев болон Эрдэм Цыренжапов гэгшэд өөр өөрын шэгнүүрнүүдтэ түрүү һууринуудые эзэлээ.
Энэ мүрысөөнэй удаа Буряад Уласай суглуулагдамал команда бүридхэгдэжэ, Владивосток хотодо үнгэргэгдэхэ Алас Дурна зүгэй федеральна тойрогой мүрысөөндэ һаяын үдэрнүүдтэ хабаадаха.
Борис БАЛДАНОВАЙ гэрэл зураг