​​Олимпиада ойртобо

Абдулрашид Садулаев

Сентябрябриин 14-22-ой үдэрнүүдтэ Казах­станай ниислэл Нур-Султан хотодо барилдаа­гаар дэлхэйн чемпионат үнгэргэгдэһэн байна. Бу­ряад орониие түлөөлһэн Стальвира Оршуш, Ма­рия Кузнецова гэгшэд шангай һуурида гаража шадабагүй.

Мүнөө жэлэй мүрысөөн ехэ удха шанартай байгаа. Юуб гэхэдэ, шэгнүүр бүхэндэ 1-6-дахи һууринуудые эзэлһэн тамиршад 2020 оной Олимпиин наадануудта ха­баадаха эрхэдэ хүртөө.

Стальвира Оршуш 53 ки­лограмм хүрэтэр шэгнүүртэ барилдахадаа, оройдоол хоёр уулзалга үнгэргөө. Гуам гүрэнэй түлөөлэгшые 13:2 гэһэн тоотойгоор бэ­лэнээр шүүһэн байна. Мүн удаадахи шатада Эквадо­рой тамиршаниие 3:2 гэһэн тоотойгоор илажа ябаад, уулзалгын һүүлшын ми­нутада хоёр очко алдажа шүүгдээ. Иигэжэ тэрэ олон тоото харагшадаа, мэргэ­жэлтэдые гайхуулаа. Сааша­даа Эквадорой басаган Гре­циин түлөөлэгшые илажа шадаагүй.

Эхэнэрнүүдэй суглуу­лагдамал команда тус чем­пионадта табан медаль абаһан байна. Инна Тражу­кова болон Наталья Воро­бьёва гэгшэд дэлхэйн чем­пионой нэрэ зэргэнүүдтэ хүртөө. Любовь Овчарова, Екатерина Полещук болон Ольга Хорошавцева хүрэл медальнуудые абаһан бай­на. Эдэ басагадые Буряадай харагшад һайнаар танина ёһотой. Юуб гэхэдэ, тэдэ Улаан-Үдэдэ болоһон Оро­дой чемпионадта болон Буряад Уласай Толгойлог­шын шанда хүртэхын түлөө уласхоорондын мүрысөөндэ хабаадаһан байна.

Наталья Воробьёва

Бүхы дээрээ Ородой ба­рилдааша басагад оройдо­ол нэгэ путёвко Олимпиа­дада абаа. Токиодо зургаан шэгнүүртэ олимпиин чем­пионууд эхэнэрнүүдэй дунда элирүүлэгдэхэ. Ка­захстанда бирагүйдэһэн тамиршад үшөө хоёр томо мүрысөөндэ хабаадажа, тэндэ путёвконуудай түлөө барилдаха юм. Европын гүрэнүүдэй иимэ тулалда­анууд Будапешт хотодо бо­лохо юм. Тиимэһээ тэндэ Стальвира Оршуш барил­дахал байха. Венгриин ни­ислэлдэ шалгараагүй һаа, София хотодо эмхидхэгдэхэ бүхэдэлхэйн шэлэн абалгын шатада оролсохо.

21 гүрэнэй тамиршад Токио ошохо эрхэдэ Нур-Султанда хүртөө. Японой табан түлөөлэгшэ гэртээ ба­рилдаха болоо. Мүн Хитадай 4 хүн 2020 ондо Япон ерэхэ.

Монголой басагад баһа нэгэл путёвко абаа гээд хэ­лэхэ хэрэгтэй. 68 килограм­май шэгнүүртэ III һуури эзэлһэн Батцэцэг Сорон­зонболд Монголые Олим­пиадада түлөөлхэ. Олимпи­ин бэшэ 55 килограммай шэгнүүртэ Болортуяа Бат- Очир шангай II һуури эзэлээ. 59 килограммай шэгнүүртэ Шоовдор Баатаржав хүрэл медальда хүртөө.

Эрэшүүлэй дунда мүрысөөндэ Ород гүрэнэй та­миршад гурбан алтан, нэгэ мүнгэн, хоёр хүрэл медаль­нуудта хүртэһэн байна. Ти­игэжэ тэдэ табан олимпиин путёвко абаа гээшэ.

Абдулрашид Садулаев, Давид Баев болон Заурбек Сидаков гэгшэд чемпионууд боложо тодороо.

Хүршэ Монголой тамир­шад Нур-Султанда нэгэшье медаль абажа шадаагүй. Хэды тиигэбэшье, 65 кило­граммда V һуури эзэлһэн Тулга Тумур Очир гүрэндөө нэгэ путёвко асараа.